Lo Torn de França, la granda espròva del ciclisme internacional que cada an travèrsa Occitània, comencèt dissabte passat a la vila neerlandesa d’Utrecht. I aguèt dos cents esportius de tot lo Mond, inscriches dins un vintenat d’esquipas. Demièg aquelas esquipas, per lo primièr còp, n’i a una del continent african: a nom MTN-Qhubeka e es de Sud-Africa.
 
Fins al 26 de julhet los participants percorreràn 3 360 quilomètres en vint e una estapas (vidèo), dont cal soslinhar las classicas de montanha que se debanan en Occitània, dins los Pirenèus e los Alps.
 
Lo Torn intrarà en Occitània lo 13 de julhet en Bearn. Passarà per Tarba, Cauterés, lo País Tòi e lo mitic Còl de Tormalet. Lo 16  de julhet anarà de Lanamesa fins al Plan de Belha en Savartés. Lo 17 partirà de Murèth. Tanben passarà per Rodés e Mende fins a arribar a Valença lo 19 de julhet. Lo 20 serà partit d’Arpitània per tornar en Occitània a Gap, ont los esportius se pausaràn una jornada. Lo 22 partiràn de Dinha fins a Pratlop, en Ubaia. D’ailà tornaràn a Gap per percórrer los Alps occitans e arpitans en finissent al mitic Alp d’Ueis (Oesen). Precisament sus aquela estapa  a l’Alp d’Ueis, France Bleu n’a preparat un espectaclós visual interactiu que permet de pojar l’estrada del còl e sos 21 contorns amb l’ordenador. Lo 26 de julhet l’espròva esportiva aurà quitat lo país per s’acabar a París.
 
Amb la tòca de far las retransmissions del Torn de mai en mai espectaclosas e immersivas, ongan l’organizacion e la societat Go Pro an signat un acòrdi per inserir cada jorn almens uèch camèras  sus de bicicletas d’esportius. Los imatges obtenguts se montaràn a la fin de la jornada.