En 2008 detenguèron al centre de Barcelona catòrze ciutadans d’origina paquistanesa e indiana, acusats de voler far un atemptat al mètro. Ara s’es descobèrt qu’aquel afar foguèt un còp montat. Onze ans puèi, una investigacion del jornal el Periódico demòstra que lo testimòni que menèt los detenguts en preson èra un confident de la polícia espanhòla. Aquel testimòni serviguèt per condemnar sens autras pròvas onze ciutadans de Barcelona a de penas de preson de sièis a uèch ans dins un jutjament que se faguèt en 2009.
 
Lo confident policièr acusèt los detenguts de far partida d’una confusa cellula jihadista que, segon el, voliá far un atemptat al mètro de Barcelona. L’inconsisténcia de las pròvas èra absoluda e tota l’operacion se justificava solament sus la paraula d’aquel individú, qu’alavetz se sabiá pas qu’èra un confident de la polícia. El se presentava coma un “terrorista penedut”.
 
Qualques jorns après las detencions, mentre que creissián los dobtes sus la veracitat de l’afar, l’Audiéncia Nacionala espahòla, lo tribunal d’excepcion que jutja los delictes de terrorisme, passèt d’informacions als mèdias en raportant que “lo grop terrorista” èra estat detengut “qualques oras abans” de far un grand atemptat al mètro. La nauta cort espanhòla afirmava quitament la data prevista per l’atac: la dimenjada del 18 al 20 de genièr.
 
La nòva, alavetz, espantèt la comunautat paquistanesa de Barcelona e comencèt de circular pels mèdias amb de gròsses títols espectacloses, quitament sus el Periódico,  qu’ara publica las evidéncias que tot èra un còp montat. Un dels pauques jornals que metèron en question la veracitat de las informacions èra Vilaweb, que publiquèt una analisi en soslinhant las enòrmas inconsisténcias de la procedura judiciària.
 
Amb las donadas qu’òm aviá, l’evidéncia que tot aquò èra un còp montat de la polícia èra fòrça granda, coma o denoncièt sus Vilaweb Sebastià Salellas, qu’èra l’avocat dels detenguts. Tota la comunautat paquistanesa de Barcelona neguèt la possibilitat de l’atemptat. Un an puèi, de representants de la comunautat paquistanesa de Barcelona afirmavan a Vilaweb qu’aquela operacion policièra e judiciària èra pas qu’un còp montat.
 
Ça que la, l’Audiéncia espanhòla condemnèt los onze detenguts a de penas d’entre sièis e uèch ans de preson. Après complir la comdemna, los qu’avián pas la nacionalitat espanhòla foguèron expulsats, segon çò qu’explica la Directa, un mèdia alternatiu que denoncièt tanplan lo còp montat. Tanben los jornalistas Benet Salellas e David Fernàndez publiquèron lo libre Rastres de Dixan ont fasián una lista exaustiva de las incongruitats de l’afar.