Lo 4au Forum de las lengas de França de debanarà diluns 23 de julhet a Lengon (Vasadés), dens l’encastre de las Nueits Atipicas.

Presidat per Martine Faure, deputada de Gironda e anciana presidenta deu Grop d’estudis sus las lengas regionaus de l’Assemblada nacionau, lo Forum de las lengas de França, creat en julhet de 2009 a la seguida de la modificacion de la Constitucion francesa de julhet de 2008 (article 75-1: ”Les langues régionales appartiennent au patrimoine de la France”) a per tòca d’examinar las politicas linguisticas de l’Estat e de las collectivitats territoriaus.
 
Iniciativa unica en França, aqueth Forum, qu’arcuelh representants de numerosas regions e lengas, a permés, despuish sa creacion, escambis neurits e constructius entre los diferents actors : governament (via la Delegacion generau a la lenga francesa e a las lengas de França), parlamentaris (deputats e senators), elejuts deu territòri, responsables associatius, juristas, ensenhants, pairs d’eslhèves, jornalistas, militants e ciutadans. A notadament contribuit a l’elaboracion d’un tèxte que serví de basa a la redaccion de duas perposicions de lei qu’estón totun, pr’amor deu contèxte politic d’aquèth darrèrs mes, jamei presentadas.
 
Aquesta 4au edicion s’inscriu dens un contèxte politic particular. En efèit, l’engatjament deu candidat Hollande a ratificar la carta europèa de las lengas regionaus e minoritàrias e la situacion politica inedita despuish 1958 (un President de la Republica socialista e una majoritat de gaucha au Senat e a l’Assemblada Nacionau) obren perspectivas naveras tà çò qu’es de la promocion de las lengas regionaus en França.
 
Aquesta 4au edicion deu Forum de las lengas de França enten donc contunhar a contribuir au desbat public sus las lengas regionaus en França, a incitar a despassar la simpla reconeishença patrimoniau de l’article 75-1 e a favorizar l’elaboracion d’una vertadera politica de sostien, de promocion e de desvolopament de las lengas de França. Examinarà notadament las questions de la ratificacion de la Carta europèa de las lengas regionaus e minoritàrias e deu vòte d’una lei-quadre permetant de donar un contienut legislatiu precis a la modificacion constitucionau de 2008, aborderà las politicas publicas de las Collectivitats territoriaus en botant en perspectiva experiéncias locaus, despartementaus e regionaus, traitarà de la question de l’ensenhament de las lengas regionaus, que s’agesca de l’iniciacion, de la paritat orària o de l’immersion.
 
Lo Programa. 





Julien Martinez-Bueno