Comença de foncionar un sit web que permet de cofinançar de projèctes enrasigats dins lo territòri. S’accèpta d’iniciativas amb “un aspècte collectiu”, “innovantas” e “que participen a una dinamica bretona”. Los impulsors preveson de finançar 300 projèctes lo primièr an de foncionament.

Ajudar una escòla immersiva en breton, recuperar de vièlhas recèptas de crespèls o contribuir a restaurar un ancian vaissèl de vela tradicional. Son tres dels projèctes que se pòdon finançar sus Kengo, lo nòu sit web de micromecenatge qu’espeliguèt fa qualques setmanas en Bretanha. “Remassar de fonzes pels projèctes dels bretons e de Bretanha”, çò dison los impulsors de l’iniciativa, similara a las existentas en d’autres nacions sens estat, coma Tot Suma als Païses Catalans.
 
Las iniciativas de finançar, segon çò qu’explica Kengo dins son blòg, son causidas per una còla de professionals qu’“accèpta solament los projèctes que participen a una dinamica bretona”, qu’ajan “un aspècte collectiu e que favoriscan l’innovacion, la creativitat e l’atractivitat territoriala”. Kengo pren una comission que pòt variar del 3% al 8%.
 
E mai se lo sit web es fòrça nòu, qualques projèctes atenhon d’apòrts per valors superioras als 2500 èuros, coma es lo cas de Privezioù Publik, una òbra de teatre escricha en breton e en “francés de Bretanha”. Las autoras de la pèça demandan d’argent per pagar los tecnicians d’esclairatge e per poder difondre las representacions.
 
Al total i a dètz projèctes disponibles, que fòrça se venon de presentar. Un dels qu’a obtengut tanben una soma importanta es lo que demanda d’argent per l’enregistrament del documentari Korriganed. Lo filme vira a l’entorn de la figura del korrigan, una sòrta de nanet de la mitologia bretona.
 
Darrièr lo projècte de Kengo i a dos grops bretons: la cooperativa de crèdit Arkéa e lo Groupe Télégramme, editor del jornal Le Télégramme.
 
 
 
 
 

---

Aquesta  nòva es adaptada de Nationalia amb qui Jornalet a un acòrdi de cooperacion