La devolucion, o transferiment de competéncias, que lo govèrn britanic se prepara de donar a Cornoalha restarà luènh de las aspiracions de l’autonomisme cornic, que voldriá veire la creacion d’una assemblada legislativa per la nacion celtica pus petita de la Grand Bretanha. E es pas solament que Londres vòlga pas autrejar a Cornoalha de poders similars als que tenon Galas o Escòcia: es que lo quite Conselh de Cornoalha los prevei solament pas dins sa propòsta de competéncias, lo document conegut coma Case for Cornwall.
 
Lo ministre de l’economia del Reialme Unit, George Osborne, anoncièt dimècres de “progrèsses” dins un “grand plan” per donar “mai de votz a Cornoalha subre las decisions localas”. Foguèt pas mai concret qu’aquò, mas l’anonci se faguèt dins l’encastre d’un discors ont Osborne enquadrèt Cornoalha dins la “devolucion dintre Anglatèrra, [que] tot just ven de començar”.
 
Çò que lo govèrn britanic prevei es de transferir de competéncias dins de domenis coma la santat, lo benèsser social o los transpòrts dins las vilas e los comtats d’Anglatèrra. Ja i a un acòrdi de devolucion amb l’aglomeracion del Grand Manchester e dimècres Osborne anoncièt de convèrsas amb Sheffield, Liverpool, Leeds e Yorkshire Oèst.
 
Lo Case for Cornwall del Conselh de Cornoalha va dins una linha similara: aspira pas a la creacion d’una cambra legislativa cornica mas a un refortiment de las competéncias del meteis Conselh, garentidas per un finançament màger.
 
Lo lidèr del Conselh, John Pollard, celebrèt dimècres las paraulas d’Osborne, e a dich que lo Case for Cornwall servirà per que los cornics “benefícien d’un sistèma integrat de santat e d’atencion sociala, d’una creissença economica significativa, de mai d’ostals accessibles, de mai d’accès al trabalh e a d’oportunitats de formacion, tot aquò amb una ret de transpòrt public fòrça melhorada”.
 
 
Lo partit autonomista cornic es decebut
 
El lidèr del partit autonomista cornic Mebyon Kernow, Dick Cole, exprimiguèt ièr sa decepcion pel fach que lo govèrn britanic contunhe de considerar Cornoalha simplament coma un comtat anglés e que percépia pas “la necessitat d’un acòrdi constitucional diferenciat per la nacion de Cornoalha”. “Imagini”, çò diguèt Cole, “qu’aquò es una indicacion probabla de çò que s’ofrirà a Cornoalha dins las setmanas venentas”.



 

---

Aquesta nòva es adaptada del jornal en linha Nationalia, amb qui Jornalet a un acòrdi de collaboracion.