En la còsta mediterranèa d’Occitània, de falses gendarmas cometon de panatòris en banda organizada sus las autoestradas, çò rapòrta France Info en citant de fonts policièras.
 
Segon aquelas informacions, los panaires serián fòrça ben organizats e agirián sustot de nuèch, abilhats en policièrs o gendarmas dempuèi qualques setmanas, e aital agredisson los automobilistas, mai que mai los toristas en vacanças.
 
Las autoritats remembran que l’accion en unifòrme es a règla pel servici quotidian dels gendarmas e policièrs. “Las accions en civil son raras pels gendarmas”. Soslinhan que las patrolhas de susvelhança se fan pas jamai a bòrd de veïculs banalizats e que, dins las autoestradas, los automobilistas son contrarotlats a un airal de repaus o a un peatge, mas pas jamai sus la benda d’arrèst d’urgéncia, pr’amor qu’es tròp perilhós. Cal soslinhar que “pas jamai un gendarma vos demanda de li donar lo vòstre sac o saquet”.
 
En cas de dobte, los conductors son pregats de compausar lo 17 o lo 112 e de senhalar lo mond que sospièchan d’èsser de falses policièrs. Davant l’incertitud, las autoritats recomandan de “demandar sa carta professionala a un gendarma en civil, qu’aquò es pas brica chocant”.