Actualitats
Manifestacions en tot er Estat espanhòu contra es mesures deth govèrn de Rajoy
Es marches que s’an hèt enes principaus ciutats de tot er Estat espanhòu e qu’an agut un seguiment fòrça nombrós
Es manifestacions contra era longa lista de reduccions sociaus e budgetàries qu’eth govèrn espanhòu aprovèc era setmana passada, que provoquèren en vrespe d’agèr que centenats de milèrs de manifestants prenguèssen es carrèrs de cadua des principaus ciutats der Estat espanhòu.
Eth vrespe d’agèr dijaus venguèc marcat pes mobilizacions contra es reduccions sociaus e budgetàries deth govèrn espanhòu. Centenats de milèrs de persones que gessèren enes carrèrs des principaus ciutats der Estat espanhòu entà protestar. Es manifestacions qu’èren convocades pes sindicats que coïncidissen a denonciar qu’es mesures deth govèrn deth Partit Popular contra era crisi be prejudícien mès que mès as caumaires, as trabalhadors publics, as pensionistes, e qu’agravaràn eth caumatge e qu’alongaràn era recession economica. Ath delà, fòrça associacions, partits politics e ciutadans que s’ahigèren as protèstes.
Aqueres mobilizacions que serviràn de termomètre entà verificar quina ei era responsa qu’an en carrèr es naui ajustaments aprovadi peth govèrn espanhòu, qu’en cas de Catalonha e Aran se somen as dera Generalitat.
Segontes era opinion generau des manifestants, s’agís deth començament d’ua seguida de mobilizacions que se debanaràn pendent tot er estiu. Se parle tanplan d’ua dusau cauma generau.
Ferriòl Macip
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Eths espanhòus que hèn plan de manifestar, mes tà qué ? Er'Espanha qu'ei ua poténcia economica solida, briga com era Grècia, i s'ei tocada tan hòrt, qu'ei previsible qu'era França e serà tocada lèu de manièra hèra mei sevèra que n'ei estat eth cas dinc adara. Dab, ath cap, er esclatament dera zòna èuro, de qui calerà botar era copa aths banquièrs i a Merkel.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari