Coma se foguèsse un filme, Joaquín Guzmán dich “El Chapo”, un dels principals caps del narcotrafec mexican, s’evadiguèt  dissabte de la preson de maximala seguretat de Mexic a travèrs d’un tunèl de mai d’1,5 quilomètre, esquipat amb un camin de fèrre, de lutz e de ventilacion. Lo tunèl aviá 1,7 mètre de naut e mai d’80 centimèctres de larg.
 
La fugida de Guzmán, cap de l’organizacion Aliança de Sang (o Cartèl de Sinaloa), a mes a malaise lo govèrn mexican après se conéisser los detalhs de l’evasion. “Long del tunèl se trobèt d’aisinas de construccion, de depauses d’oxigèn, de recipients amb de combustible e de canalizacions entre d’autres objèctes”, çò a precisat lo comissari nacional de la seguretat, Monte Alejandro Rubido.
 
Tot èra preparat fins al darrièr detalh. Amagat jos un bocal de la docha de sa cellula, i aviá un conduch vertical de 10 mètres de prigondor amb un escalièr que menava fins al tunèl. Après davalar, Guzmán trobèt una motocicleta. Percorreguèt entre dos ralhs de 1500 mètres e arribèt fins a una abitança de Colonia Santa Juanita. Un còp fòra lo tunèl desapareguèt. Se sap pas s’o faguèt en veitura o en elicoptèr.
 
Segon çò que rapòrta La Jornada, lo personal de la preson s’assabentèt de la fugida doas oras puèi e la notifiquèt a l’armada tres oras puèi. A l’ora d’ara las autoritats son a interrogar 31 foncionaris de la preson per ensajar d’esclarzir los faches e las responsabilitats.
 
 
Es pas lo primièr còp
 
“El Chapo” s’evadiguèt ja d’una preson mexicana en 2001, après èsser estat capturat en 1993 en Guatemala. En aquela escasença, s’amaguèt supausadament dins un carreton de la bugadariá e, gràcias a la complicitat dels agents de seguretat, arribèt de passar per sièis ponches de vigilància fins a poder sortir del complèxe de seguretat. Après 13 ans sens poder èsser capturat per la polícia mexicana, en 2014 foguèt arrestat mas ara s’es evadit 17 meses puèi.
 
Es de veire l’infografia qu’a publicat lo jornal espanhòl El País. Çai jos vaicí los primièrs imatges que Russia Today a emés de la fin del tunèl qu’a permés a Guzmán de protagionizar l’evasion del sègle.