Lo servici postal de Soïssa a començat un programa d’assages, que s’esperlongarà pendent cinc ans, per liurar de letras e de paquets postals per aire, amb l’ajuda de drònes. La rapiditat d’aquel sistèma, que se mena a tèrme amb la tecnologia de la societat Matternet, presenta ça que la de limits importants pr’amor que los enviaments pòdon pas despassar lo quilo de pes e l’autonomia de la batariá dels pichons aparelhs volants es de mens de vint quilomètres.
 
E mai s’an pas especificat ont s’assajarà, lo sistèma es adaptat principalament per las zònas de montanha d’accès malaisit, per de situacions d’emergéncia e per d’enviaments que requerisson la maximala prioritat, coma per exemple las pròvas de laboratòri.