En 2012, lo jornalista mexican Luis Cardona estudiava, per un jornal local, una ondada de desaparicions de joves gojats, que de bandas restacadas al narcotrafec los emportavan per los far trabalhar a la cultura de la dròga. Après que Cardona ne publiquèr qualques reportatges, lo 19 de setembre d’aquel an Cardona lo sequestrèron a Nuevo Casas Grande (Chihuahua). Quand foguèt liberat, après qualques oras, Cardona se deguèt amagar dins la capitala del país. Ara, gràcias al collectiu Sácalepunta, explica l’experiéncia de la sequestracion e del drama posterior en de dessenhs animats.
 
Amb aquel format original vòl denonciar las dificultats creissentas d’exercir lo jornalisme en Mexic ont, dempuèi l’an 2000, se calcula qu’un centenat de jornalistas son estats assassinats. Vòl far conéisser una realitat fòrça desconeguda: la vida dels jornalistas desplaçats e exiliats en Mexic. Cal dire que los mèdias que tractan la violéncia, de costuma, se concentran que sus las agressions e los assassinats mas, segon Cardona, relatan pas lo drama que representa aver de daissar l’ostal, lo trabalh e de còps la familha après la sequestracion.
 
Lo cortmetratge entitolat Soy el número 16 (Soi lo numèro 16), de dètz minutas, cèrca de far visibla aquela realitat, que Luis Cardona l’a viscuda en plen.