Tocant l’incendi del sit petroquimic de Lyondell Basell a Bèrra l’Estanh, la pista d’un acte de malvolença es de mai en mai privilegiada pels enquestaires, segon çò que rapòrta Le Figaro. De membres de l’Institut de Recèrca Criminala de la Gendarmariá Estatala (IRCGN segon sa sigla en francés), amb de gendarmas de la seccion de recèrca de Marselha, trobèron ièr dimècres “d’elements que poirián constituir, se son identificats coma tals, una cadena pirotecnica”, es a dire, un sistèma de mesa a fuòc. Le Figaro, que cita de fonts pròchas del dorsièr, explica que los gendarmas an quitament trobat un passatge adobat a travèrs del cledís.
 
Los enquestaires ara devon determinar se i a qualque relacion amb lo recent panatòri d’explosius del sit militar de Miramàs, que se tròba a un vintenat de quilomères. Sembla que lo cledís se talhèt de la meteissa faiçon.
 
 
Vigilància especiala dins los sits classificats Seveso
 
Parallèlament, lo ministre francés de l’interior, Bernard Cazeneuve, a demandat als prefèctes de refortir la vigilància a l’entorn dels sits sensibles, mai que mai los que son classificats Seveso. Seveso es una directiva europèa qu’impausa lo recensament dels establiments industrials que presentan de risques importants. Lo nom de Seveso evòca la catastròfa industriala e environamentala que se passèt en 1976 a la vila de Seveso (Lombardia, Itàlia).
 
Cazeneuve mandèt una nòta als prefèctes dimars passat que lor demanda de prene contacte amb los responsables d’aqueles sits classificats Seveso per i far una inspeccion menimosa de las installacions e ne verificar lo bon foncionament, mai que mai del sistèma de videoproteccion. Lo ministre tanplan a demandat als prefèctes de recensar los autres ponches sensibles, susceptibles d’èsser de possibles objectius d’atacs de malvolença, çò rapòrta Le Parisien.
 
 
I a un sit Seveso près d’en cò vòstre?
 
Lo jornal Libération publica un article suls sits Seveso de l’estat francés, que son a l’entorn de 1200, amb una mapa qu’indica ont se situan.