Lo pilòt niçard Jules Bianchinos a quitats. Nòu meses après lo grand accident que patiguèt al Grand Prèmi de Japon, l’esportiu moriguèt al Centre Espitalièr Universitari de Niça dins sos 25 ans. Ièr de matin la familha anoncièt lo decès: “Jules s’es batut, coma a totjorn fach, mas ièr la sieu batalha prenguèt fin”. Lo mitan de l’espòrt automobil a començat de mostrar de respècte e de tristesa pel jove pilòt, coma o rapòrta ben Nice Matin.
 
Après lo terrible accident patit en octòbre passat, Bianchi foguèt operat sul pic de lesions grèvas al cap e plaçat en suènhs intensius. Al mitan de novembre foguèt repatriat e sonhat a l’espital de Niça dins un estat fòrça grèu que fin finala a pas pogut téner.
 
Nòu meses enrèire, lo jorn de l’accident, quand mancavan 13 torns per acabar l’espròva automobila, Bianchi s’escrachèt, amb la veitura Marussia que menava, contra una grua qu’assistissiá lo pilòt Adrian Subtil, car aquel d’aquí s’èra accidentat contra las proteccions lateralas del circuit. Lo niçard demorèt inconscient e lo menèron còp sec a l’espital de Mie en ambulància. Son estat èra talament grèu qu’èra pas aconselhat de lo menar en elicoptèr. L’operèron sul pic d’un ematòma subdural.
 
A la demanda de la Federacion Internacionala d’Automobilisme (FIA), se difusèt pas cap d’imatge vidèo de l’accident del pilòt occitan. Pasmens, los imatges e los comentaris que se partegèron suls rets socials atestèron la gravitat de l’accident. Après l’accident de Bianchi arrestèron la corsa.