Los Estats Units e Cuba an dobèrt aqueste diluns passat lors respectivas ambaissadas, çò que simboliza lo restabliment de las relacions diplomaticas entre los dos païses. Lo secretari d’estat dels Estats Units, John Kerry, e lo cancelièr cuban, Bruno Rodríguez, se trobèron a Washington per clavar aquel acòrdi simbolic qu’a mes fin a cinquanta ans d’enemistat e de blocatge
 
La delegacion cubana als Estats Units èra formada per un trentenat de personas dont lo cantaire Silvio Rodríguez. L’acte foguèt multitudinari, amb la preséncia d’aperaquí cinc cents convidats. Tocant l’ambaissada dels Estats Units a l’Avana, lo Departament d’Estat anoncièt que se fariá pas cap d’acte especial fins al moment que John Kerry i poguèsse assistir.
 
S’anoncièt fa sèt meses lo restabliment de las relacions diplomaticas, trencadas en 1961. Aquel an, lo president estatsunidenc Dwight Eisenhower barrèt l’ambaissada dels Estats Units a l’Avana, paucas setmanas abans la presa de possession del president just elegit John F. Kennedy.