Lo celèbre entraïnaire de fotbòl catalan Josep Guardiola a anonciat que barrarà la lista unitària independentista prevista per las eleccions catalanas del 27 de setembre que ven. Segon çò que rapòrta El País, Guardiola a pas cap d’intencion d’èsser deputat mas crei que lo luòc simbolic es la melhora manièra de sosténer lo procès d’independéncia.
 
Guardiola se tròba actualament en China amb son esquipa, lo Bayern de Munic. Es, totun, un simbòl internacional del Barça, de Catalonha e ara de l’independentisme catalan. De fach, Guardiola aviá ja manifestat son independentisme qualques còps abans, en collaborant amb d’actes de l’Assemblada Nacionala Catalana (ANC), e confirmèt qu’es partisan de l’independéncia sus Catalonha Ràdio.


En occitan
 
Aquela candidatura electoralase presentèt ièr de ser a Barcelona e amassa los principals partits independentistas amb de gents de la societat civila. Sa tòca es que l’eleccion autonomica del 27 de setembre venga un plebiscit independentista. La candidatura se nomena "Junts pel sí" (Amassa per l'òc) e dins lo discors de presentacion, lo cap de la lista Raül Romeva parlèt tanben en occitan pel pòble aranés (minuta 10:25 del vidèo que seguís). “Ara gent que conformam aguest acòrd mos unís era volontat de bastir un país mès just e mès coësionat entà toti”, çò diguèt.
 
La CUP serà pas dins la lista pr’amor que revendicava una lista sens politicians.





Romeva: 'Proclamarem la  independència...per vilawebtv