Del 25 de julhet al 1r d’agost se debanarà a Lilla lo 100n Congrès Universal d’Esperanto. Es de notar que lo primièr se passèt en 1905 a Boulogne-sur-Mer e que los organizaires o an volgut commemorar, per la centena edicion, dins la meteissa region.
 
Mai de 2500 personas d’81 païses son ja inscrichas. Lo programa cultural e sustot musical foguèt fisat a Floreal Martorell que demòra al ras de Tolosa (Dònavila) e qu’apitèt lo famós labèl de musica esperanto Vinilkosmo: aqueste produtz de grops e de cantaires del Mond sencer que s’exprimisson dins la lenga internacionala creada en 1887 per Ludwik-Lazar Zamenhof dins la vila de Białystok, ara en Polonha.
 
Los espectacles veiràn se produire d’artistas venguts, en mai de l’estat francés, de Còngo, dels Païses Basses, de Polonha, dels Açòres, d’Alemanha, de Japon, d’Itàlia, de Veneçuèla, d’Ongria, de Belgica, de Suècia, de Russia, de Lituània e d’Hong Kong.
 
Occitània serà plan representada per doas formacions. La primièra s’apèla Maragane, un grop peiregòrd de musica tradicionala de dançar que compta una sansònha, un violon, una contrabassa e un acordeon. An produch un CD en esperanto dins lo qual se pòt ausir La mazurca del lanternaire jos lo títol La lanternisto.
 
La segonda formacion que portarà las colors occitanas serà Brankabodegaires amb tres bodegas, un tambor en un banjo. Un album de musica occitana es en preparacion en cò del labèl Vinilkosmo. Lo ligam se fa pel cantaire Joan-Marc Leclercq, conegut en defòra dels legeires del Jornalet dins lo mond esperantista jos lo chafre jOmO. Es a botar la darrèra man a un libròt d’aprendissatge de l’occitan destinat als aprenents esperantofòns.
 
Cal notar l’abséncia ongan de la formacion dels catalans de Kaj Tiel Plu, autora de tres albums de musica tradicionala occitana, catalana e sefardita sul meteis labèl Vinilkosmo.
 
Los concèrts, dobèrts a totes, se debanaràn mai que mai a la Gara Saint-Sauveur de Lilla.