Après lo grand succès d’arunan, ongan la còla de la Chancada tornarà percórrer Gasconha en chancas, del 13 al 24 d’agost, de Baiona a Marmanda, per far la promocion de la cultura gascona. La còla dels chancaires es aital a far 280 quilomètres per “encoratjar las gents a contunhar de parlar gascon”. Los acompanharàn de ciclistas e, pels endreches ont passaràn, los aculhiràn de mond del parçan, mai que mai restacats a la cultura occitana, que lor prepausaràn de manjar e dormir. Aital, dins las pausas convivialas se partejarà, se cantarà, se dançarà e se jogarà de musica del país, coma se faguèt arunan. Tanben rescontraràn d’autres chancaires que faràn qualques quilomètres amb eles.
 
Las chancas èran tradicionalament emplegadas dins las Lanas de Gasconha per anar d’un luòc a l’autre e per susvelhar los motons, quand las Lanas èran una granda zòna umida e que lor economia se basava sus l’elevatge ovin. Los pins i foguèron plantats al sègle XIX.
 
Podètz seguir l’itinerari, la gèsta e las aventuras dels chancaires sul sit web de la Chancada, sus lor pagina Facebook, sus Instagram e sus Twitter.