Los escolans d’una escòla de Palmerston, en Nòva Zelanda, an dançat un “haka” ceremonial per rendre omenatge a lor professor recentament defunt, Dawson Tamatea. Mai de 1700 escolans, dont la majoritat de maòris, recebèron amb aquel haka dins la cort de l’escòla la veitura que menava lo taüt. La veitura s’arrestèt mentre que se fasiá la dança e a la fin la familha del mòrt mercegèt lo gèst que, segon eles, auriá emplit de gaug lo defunt.
 
Lo vidèo d’aquela accion esmoventa se publiquèt sus Internet dimenge passat e a recebut mai d’un milion e mièg de vesitas.
 
Quand ausissèm parlar d’haka, o associam normalamant a la dança de guèrra maòri que la seleccion neozelandesa de rugbi a popularizat dins lo Mond entièr. D’efièch, los All Blacks començan normalament las partidas amb aquela dança tradicionala per far paur a l’esquipa rivala. Mas, de fach, i a fòrça tipes d’haka: de provocacion, d’aprobacion, d’encoratjament, d’omenatge, de fiertat, de gaug, de malaür, etc. Los divèrses tipes d’haka son practicats per fòrça grops socials.