Dimècres passat trobèron lo fragment d’un Boeing 777 sus l’illa de la Reünion, dins l’Ocean Indian. Ara, los especialistas son a enquestar s’aquela trobalha correspond al vòl MH370 de Malaysia Airlines, qu’èra tanben un Boeing 777, que desapareguèt misteriosament en març de 2014. La pèça, trobada sus una plaja de l’illa, sembla qu’es un alairon. Sus la meteissa plaja se trobèt de rèstas d’una valisa, segon çò que rapòrta lo Journal de l’île de la Réunion.
 

Las rèstas s’analisaràn a Tolosa
 
Lo Burèu Enquèsta e Accidents (BÈA) coordenarà l’enquèsta internacionala, conducha per d’expèrts malaisians e australians. Lo fragment d’avion serà menat a Tolosa per las autoritats ont serà examinat, çò rapòrta La Dépêche.
 
 
Luènh de l’endrech de la desaparicion
 
L’illa La Reünion es a una granda distància de l’airal de recèrca e en mai d’aquò son arribats d’autres accidents pus près d’aquel endrech ont foguèt trobada la partida de l’avion. En mai, lo vòl MH370 originàriament se dirigissiá vèrs Pequin, es a dire, la rota opausada cap a l’èst de Kuala Lumpur.
 
L’avion de Malaysia Airlines que fasiá lo vòl MH370 desapareguèt mentre que volava de Kuala Lumpur a Pequin, amb 239 personas a bòrd. Un an e quatre meses après la desaparicion s’es pas localizat cap de pista ni cap de rèsta, fins ara.
 
 
De scientifics chineses que descobriguèron la transformabilitat dels metals aurián viatjat dins l’avion desaparegut
 
Los fisicians chineses Lei Sheng, Jie Zhang e Jing Liu, de l’Universitat de Tsinghua de Pequin, publiquèron en genièr passat un estudi sus la transformabilitat dels metals, que podián assumir divèrsas formas, se mòure e se transformar. Segon los scientifics, aquel estudi poiriá implicar dins l’avenir lo dessenh de robòts que càmbian de forma e tanben la creacion d’una infinitat d’organs artificials pels umans. Aqueles tres fisicians aurián viatjat dins lo vòl MH370, l’avion de Malaysia Airlines que desapareguèt lo 8 de març passat, segon qualques mèdias.
 
E mai se lo metal liquid mai conegut es lo mercuri, qu’es fòrça toxic, i a d’autres metals e aliatges que son liquids a temperatura ambienta e que son pas brica nocius. En aquel cas, en concret, se tracta d’un aliatge de galli, indi e selèni, amb una temperatura de fusion de 10 gras Cèlsius aperaquí. Aquel aliatge a atirat darrièrament l’atencion de la comunautat scientifica pr’amor que se pòt emplegar per la refrigeracion dels microprocessors e quitament dins de tecnologias d’impression modèrnas.
 
Aqueles scientifics chineses capitèron a far qu’aquel metal liquid assumiguèsse de formas simplas mejançant lo depaus d’una primièra pellicula d’aquel aliatge sus l’aiga e amb l’aplicacion d’un camp electric. Amb de camps electromagnetics, los cercaires capitèron a far que lo metal prenguèsse una forma esferica. Segon eles, aquel efièch foguèt lo resultat de l’equilibri entre la tension superficiala dins lo metal liquid e las fòrças electricas aplicadas a sa superfícia. Al delà, en emplegant las fòrças de tension superficiala e las fòrças electrostaticas, la còla chinesa capitèt a mòure e a far virar l’esfèra de metal sus l’aiga, en la far prene, puèi, la forma d’un vèrme, en tot modular lo camp electric.
 
Lo terrible robòt T-1000 del filme Terminator 2 a una esqueleta intèrna de metal liquid podent assumir la forma de quin objècte o quina persona que siá. Sa natura liquida lo fa quitament immun a las balas.