Era conselhèra dera governacion dera Generalitat, Meritxell Borràs, e eth sindic d’Aran, Carlos Barrera, an presidit era dusau amassada dera comission dempús dera sua creacion eth mes de hereuèr passat. Era comission bilaterau ei er organ permanent de relacion entre es govèrns dera Generalitat e d’Aran, d’acòrd damb era Lei de regim especiau d’Aran. Se constituirà un grop de trabalh entà estudiar, presentar e desvolopar eth sistèma de finançament deth territòri dera Val d’Aran.

Era conselhèra dera governacion e des relacions institucionaus dera Generalitat de Catalonha, Meritxell Borràs, e eth sindic d’Aran, Carlos Barrera, an presidit, aguest diuendres passat, era reünion deth plen dera comission bilaterau Generalitat de Catalonha-Conselh Generau d’Aran, qu’a agut lòc en Palai dera Generalitat de Catalonha.
 
Tanben an participat ara reünion dera comission bilaterau eth secretari generau deth Departament dera Governacion e des Relacions Institucionaus dera Generalitat, Francesc Esteve; eth secretari dera cooperacion e coordinacion des administracions locaus, Joaquim Ferrer; eth delegat territoriau deth Govèrn en Naut Pirenèu e Aran, Albert Alins; eth secretari dera comunicacion deth Govèrn dera Generalitat, Josep Martí; eth director deth Burèu entath Desvolopament der Autogovèrn, Xavier Bernadí; e era cap deth Gabinet Tecnic deth Departament dera Economia e dera Coneishença, Susanna Bonastre. Coma representants deth Conselh Generau d’Aran, i an assistit eth vicesindic d’Aran e conselhèr dera administracion publica, des finances e dera coneishença, Luis Carlos Medina; eth conselhèr deth territòri, Tònho Boya; era conselhèra deth torisme e deth desvolopament economic, Anna Díaz; e eth secretari dera representacion aranesa, Enrique Pérez.
 
Se tracte dera dusau reünion qu’a celebrat era comission dempús dera sua constitucion, eth mes de hereuèr passat, en compliment dera Lei 1/2015, de hereuèr, deth regim especiau d’Aran. Damb aguesta dusau reünion se demòstre er engatjament dera Generalitat damb eth desplegament dera Lei deth regim especiau d’Aran, en aguest sens, era comission a decidit de fixar un calendèr entath transferiment de competéncies dera Generalitat ath Conselh Generau d’Aran, entà dotà’c des plees competéncies que fixe era Lei. Enes dues reünions celebrades enquia ara son ja aprovades siés transferiments de servicis e de mejans.
 
 
Grop de trabalh entà negociar eth finançament
 
Era comission bilaterau a decidit era creacion d’un grop de trabalh entath finançament d’Aran, que s’encargarà dera negociacion deth finançament especific previst entath país occitan. Eth grop de trabalh serà constituit per 3 representants dera Generalitat de Catalonha e 3 representants deth Conselh Generau d’Aran.
 
Eth grop de trabalh a coma objectius d’iniciar e desvolopar era negociacion tocant era dotacion deth Hons entath Finançament deth Conselh Generau d’Aran; d’estudiar e prepausar era procedura, era metodologia e eth calendèr entara revision deth modèl de finançament; e d’analisar e prepausar es contenguts d’acòrd de finançament entre era Generalitat e eth Conselh Generau d’Aran entà 2015, segons es previsions legaus aplicables.
 
Segons eth sindic d’Aran, Carlos Barrera, “aguest esperit de començar a trabalhar en nau modèl de finançament entà Aran, consent damb çò que s’establic ena Lei d’Aran, ei basic entara Val d’Aran, entath desplegament deth sòn autogovèrn e entath benèster des nòsti vesins e vesies, pera quau causa priorizam eth trabalh destinat a establir un modèl de finançament estable e benefic entath país”.
 
Era comission bilaterau a decidit era aumentacion dera contribucion economica dera Generalitat entath finançament des competéncies transferides en matèria de salut. Er impòrt ei de 304 452,45 èuros, “destinadi a incrementar e melhorar es servicis tant importants coma era cirurgia ortopedica, era traumatologia e era oncologia”, çò a soslinhat era conselhèra deth torisme e deth desvolopament economic, Anna Díaz.
 
Eth vicesindic d’Aran, Luis Carlos Medina, a hijut que “damb aguest acòrd, aguest finançament s’incorporarà ath deth Conselh Generau d’Aran entàs ans que vién, çò que da ua garentida de continuitat a un servici essenciau”.
 
Fin finau, en torn dubèrt de paraules, eth sindic d’Aran, Carlos Barrera, e eth conselhèr deth territòri d’Aran, Tònho Boya, an informat era Comission der estat des negociacions entre eth Departament der Ensenhament dera Generalitat e eth Conselh Generau sus es trabalhs restants enes espacis exteriors dera Residéncia de Léser e Temps Liure de Les que se transferic ath Conselh Generau d’Aran ena darrèra comission bilaterau.
 
“Demoram de desblocar aqueri trabalhs restants eth mès lèu possible entà poder abilitar aqueres zònes exteriores coma parc infantil e cedir-lo ara comuna de Les”, çò a explicat eth conselhèr Tònho Boya.
 
 
 
 
Conselh Generau d’Aran