De representants de l’Assemblada Nacionala Catalana de la Val d’Aran (ANC Val d’Aran) demandèron ièr a Salau que lo 27 de setembre que ven, se vòte en Catalonha per una de las candidaturas que tenon compte d’Aran. A l’ora d’ara la lista unitària qu’amassa CDC, ÈRC e la societat civila compta l’aranés Àlex Moga, amb la tòca de defendre la realitat nacionala occitana d’Aran dins lo Parlament de Catalonha, del temps que la CUP compta Mireia Boya coma candidata al Parlament amb la meteissa tòca.
 
La crida se faguèt dins l’encastre del 28n rassemblament qu’amassa occitans e catalans cada primièr dimenge d’agost al Pòrt de Salau, a 2100 mètres de nautada. Los occitans sortisson de Salau (Coseran) e los catalans de la vila catalana d’Esterri d’Àneu. L’amassada es venguda un simbòl d’amistat e de revendicacion nacionala dels dos pòbles vesins.
 
Ongan, lo bèl temps a favorit la participacion, qu’a comptat gaireben 700 personas segon un comunicat del CAÒC, aquò es una chifra recòrd.
 
Coma totjorn, se faguèt d’actes d’afrairament, d’escambis de produches dels dos terraires, de danças tradicionalas, de discorses de benvenguda, e fin finala s’issèt las bandièras de las doas nacions del temps que lo mond cantavan Se Canta e Els Segadors.
 
L’emplaçament d’aquel pòrt es simbolic: se tracta d’un camin natural entre Occitània e Catalonha qu’a servit istoricament per connectar los dos pòbles.
 
Per arribar al pòrt, als occitans lor cal caminar tres oras del temps mentre que los catalans sonque marchan 45 minutas. Es pr’amor d’aquò que tradicionalament los occitans pòrtan lo formatge e los catalans i menan lo vin.