Escandal e accident de construccion a Bordèu. Un balcon d’una bastissa tota nòva, de l’ecoquartièr Ginko a Bordèu-Lac,  s’es esfondrat del 4n estatge sul 2d estatge. L’accident a pas fach de victimas, mas a dobèrt la polemica sus la qualitat de la construccion dels bastiments recents. Lo balcon s’es esfondrat sens suportar lo mendre subrepés. Lo quartièr vegèt arribar sos primièrs abitants en 2012.
 
Mentre que los expèrts en assegurança son a examinar los luòcs per determinar las responsabilitats, los vesins, los elegits e los rets socials an pas tardat a exprimir lor malcontentament. Le Figaro rapòrta que dins aquel ecoquartièr, los planhs son freqüents per d’inflitracions, de problèmas de calfatge, de marridas finicions de las fenèstras, etc.
 
D’elegits socialistas an denonciat una vila daissada “en pastura a l’especulacion immobilièra au detriment de la qualitat”. En mai d’aquò, lo conselhièr departamental Philippe Dorthe demanda quitament “un moratòria” sus totes los programas immobilièrs de la vila e reclama “una pausa per analisar aquela politica”.
 
Del costat de l’immobilièr, Bouygues Immobilier a dich dins un comunicat que son “extremadament sensibles a l’inquietud que genèra aqueste eveniment pels abitants” e qu’an pres “las mesuras conservatòrias que s’impausavan per relotjar las 4 familhas concernidas [...] e securizar l’immòble”. Lo document precisa que son a enquestar fins al pus mendre detalh per “identificar las causas de la casuda e preconizar las eventualas investigacions complementàrias de realizar sul bastiment”. 

---

Sud Ouest ne publica d'imatges