Tot aviá plan començat divendres a Brutús. Onze milierats d’espectators èran venguts seguir la partida entre los catalans e Sant-Helens. Als cants dels sostens angleses, respondián en alternància los “catalans! catalans!“ dins un ambient amical.
 
Sus la pelena, l’afrontament foguèt fòrt e nharrut. Los Dracs començavan per dominar. Vincenç Dupòrt concretizava aquel temps. Scòtt Dureau transformava e ajustava una penalitat, mas lo dobertura Lance Hohaia se passejava dins la defensa locala per marcar, puèi l’alièr Meli marcava al pè del bandieret per balhar l’avantatge als Sants. Los Dracs se tornavan installar dins los 20m angleses.
 
Lo dobertura Leon Pryce partissiá costat tampat, crosava amb Sebastian Raguin qu’en faguent la perinqueta puntava l’ensag. Scòtt Dureau transformava e passava un tombat al restontir de la còrna: 15-10.
 
La represa seriá un pauc mai complicada pels Dracs: los Sants prenián l’avantatge amb un ensag de Flannery que passava lançat dins una defensa locala petrificada. 16-15 pels vesitaires.
 
Sus una candèla, quatre Dracs demoravan empantenats, se geinavan e Makinson recuperava la pauma al rebomb per portar l’avantatge de son equipa a 20-15.
 
Demorava un vintenat de minutas a jogar e los Dracs se lancèron, se ronzèron a l’ataca. L’alièr Cardace daissèt escapar la pauma al moment de cabuçar darrèr la linha. Sebastian Raguin marquèt, l’arbitre demandèt la vidèo e tornèt a una fauta al despart de l’accion.
 
Los Angleses s’esforçavan, totjorn a la limita, a retardar los tenguts. Lor segonda linha Pulueta preniá un carton roge aprèp un placatge dangeirós. Lo capitani-pilar Casty trauquèt dos còps, mas doblidèt (o poguèt pas) servir un partenari.
 
A 5 minutas de la fin, Scòtt Dureau tustava dins la diagonala e Damian Cardace esclafava lo balon al sòl. L’arbitre tornava demandar l’ajuda de la vidèo e cadun a se repassar los images jos totes los angles, a vitèssa reala o lenta, amb o sens lunetas, se demanda quna deca poguèt plan trapar l’arbitre-videò per refusar l’ensag.
 
Portats per las nautas valors de Paratge, disèm tot nòstre respècte pels arbitres, mas d’unas decisions pareisson plan discutablas (mai que mai quand son desfavorablas!). N’anam pas donar d’exemple que lo cap-redactor romegariá de veire paginas e paginas utilizadas per aquesta question.
 
Enfins, lo tot es que, del costat de Perpinhan, se brama a l’injustícia mas l’entrainaire Trent Robinson pren de la nautor per sotalinhar la granda partida de Sant-Helens e lo manca de realisme dels sang e aur dins los 20 mètres advèrses.
 
Los Dracs daissan la tresena plaça al classament a lor adversari del jorn. Normalament, amb lo retorn de Ferriòl per solidificar lo paquet, deurián tornar trapar lo camin de la victòria tre dissabte amb la recepcion a Brutús, a 6 oras del vèspre, dels darrièrs de la competicion: los Cavals-Fòls de Londres.
 
En Elita, las equipas van tornar prene l’entrainament en vista de la debuta de la sason, los 22 e 23 de setembre. Lesinhan vei partir los fraires Bentley a Pià e Munoz e Matieu Alberolà a Limós, mas fa signar lo pianenc Antòni Carrère.
 
Carcassona vei son tresena linha Luke Swain signar al XIII catalan, mas se renfortís amb dos australians: Troy Savage en tres-quarts e Ben Laity coma pilar.




Alan Roch