Los atemptats de l’11 de setembre de 2001 als Estats Units demoraràn marcats dins la memòria de la majoritat dels ciutadans de tot lo Mond. L’impacte dels avions contra las tors bessonas del World Trade Center de Nòva York es un imatge qu’a fach lo torn del Mond milanta còps. Aqueles faches esmoguèron lo mond perque la barbariá se fasiá presenta d’un biais espectaclós al còr d’un dels estats que semblavan mai segurs del Mond. Totes se remembran tanben de l’imatge del president George W. Bush dins una escòla infantila en lo moment qu’un assistent sieu li anonciava la tragica notícia a l’aurelha. Mas degun a pas jamai vist cossí se visquèt las oras posterioras a l’atemptat a l’Ostal Blanc, l’edifici que concentra simbolicament lo mai de poder dins lo Mond. Ara los Archius Nacionals estatsunidencs an publicat las fotografias que las faguèt lo fotograf oficial de la presidéncia dels Estats Units pendent aquel jorn tragic. S’i pòt veire George Bush, sa femna Laura, lo vicepresident Dick Cheney amb sa femna, la secretària d’estat Condoleezza Rice, lo director de la CIA George Tenet e los maximals collaboradors de la presidéncia estatsunidenca. Lo programa Frontline de la cadena PBS a fach aqueste montatge amb los imatges que s’èran jamai vistes.