La revista estatsunidenca Time a comparat las fortunas mai grandas de l’istòria e a fach un classament de las dètz personas mai ricas de totes los tempses. Aquel classament particular s’es fach a partir d’una enquèsta que i an participat d’istorians e d’economistas, e vaicí los resultats.

10. Gengis Khan
 
Lo primièr emperaire mongòl capitèt a contrarotlar l’empèri mai grand de tota l’istòria. Conquistèt una granda part d’Asia e de l’èst d’Euròpa en comprenent China, Russia, Pèrsia e l’Orient mejan.
 
 
9. Bill Gates
 
Es la persona mai rica de l’actualitat. Segon la revista Forbes, lo fondador de Microsoft acomola 79 300 milions de dolars.
 
 
8. Alan lo Roge
 
Aquel nòble breton que participèt a la conquista normanda d’Anglatèrra moriguèt amb una fortuna d’onze mila liuras. Segon los calculs de Philip Beresford e Bill Rubinstein, autors del libre Los mai rics dels rics, equivaldriá uèi lo jorn a 117 000 milions d’èuros.
 
 
7. John D. Rockefeller
 
Lo magnat del petròli arribèt de contrarotlar lo 90% de la produccion dels Estats Units a travèrs de la societat Standard Oil. Moriguèt amb una fortuna d’1,5 miliard de dolars, que dins lo contèxt economic actual seriá de 341 miliards.
 
 
6. Andrew Carnegie
 
Aquel estatsunidenc d’origina escocesa vendèt sa societat US Steel a JP Morgan per 480 milions de dolars en 1901. Sa fortuna transportada uèi seriá de 327 miliards de dolars.
 
 
5. Josèp Stalin
 
Lo maximal dirigent de l’Union Sovietica entre 1922 e 1953 es comprés dins aquesta lista sens que s’avalore exactament la valor de sa riquesa. Los economistas qu’an collaborat amb la revista Time l’an comprés coma cap suprèm e absolut d’una economia de proprietat estatala.
 
 
4. Akbar Ir
 
Tanben conegut coma Rei dels Reis o Akbar lo Grand, foguèt lo tresen emperaire mogòl en Índia (1556-1605). Pendent lo sieu mandat, l’Empèri Mogòl concentrava lo quart de tota la produccion economica mondiala. Qualques estudis economics sus aquela epòca considèran qu’Akbar foguèt l’òme mai ric de son temps.
 
 
3. L’emperaire Song
 
La dinastia chinesa dels Song (entre 960 e 1279) constituiguèt un dels empèris mai potents economicament de totes los tempses. L’economia chinesa d’aquel periòde significava entre lo 25% e lo 30% de la produccion economica mondiala. La capacitat fiscala e lo sens de l’innovacion tecnica foguèron las marcas d’identitat de la dinastia Song. L’emperaire aviá un contraròtle absolut de l’economia e acomolava un poder immens.
 
 
2. August
 
L’Empèri Roman acomolèt entre lo 25% e lo 30% de la produccion economica mondiala, çò dison qualques istorians e economistas. Fòrça cesars acomolèron de riquesa, mas foguèt August que, segon lo professor d’Stanford Ian Morris, arribèt d’aver personalament un cinquen de la riquesa de l’empèri. Demièg d’autras causas, August èra proprietari individualament de tota Egipte.
 
 
1. Mansa Musa
 
Mansa Musa Ir es lo personatge mai ric de l’istòria, segon los expèrts consultats per la revista Time. Foguèt lo poderós “mansa” (rei dels reis o emperaire) de l’Empèri de Mali. Aquela carga li autrejava l’immensa responsabilitat d’èsser lo mai grand productor d’aur del Mond. Los economistas dison qu’es impossible de calcular la riquesa de Musa, mas esitan pas a lo considerar lo mai ric de totes los tempses.