Aquesta fin de setmana marcava la debuta de la segonda fasa de Superliga amb lo Superuèit. Dijòus, Wigan batiá Huddersfield 30-22. Divendres, Leeds atomizèt Warrington 49-10 e Castleford finiguèt que batèt Hull FC: 36-30.
 
Dissabte, Saint Helens aviá fait seguir la pluèja a la mòda anglesa sus Perpinhan, mas s’arrestèt a la debuta de la partida.
 
Un còp de pè a ras de pelena de Scott Dureau vegèt Gigòt puntar l’ensag. Lo mesclanha catalan ajustava la transformacion, puèi una penalitat. A la 23a minuta, òm aguèt dreit a la classica passa enabans pas vista per l’arbitre que veniá ensag anglés. Mas, a la mièja ora, Anderson enfonzèt la defensa dels Sants per un segond ensag catalan. Los angleses replicavan per un ensag de l’alièr Dawson (35a). A la 39a, Bòsc, que tornava sus la pelena aprèp dos meses d’arrèst mentre que Carney un còp de mai trigossava la camba, interceptèt una palma que trasmetèt a Morgan Escarré que s’anèt amorrar entre los pals: 20-10 pels catalans a la pausa.
 
A la represa, la partida manquèt de capvirar: placatge naut de Ben Pomeroy e l’arbitre En Silverwood sortissiá lo roge. Un còp de mai la paur de se faire panar al canton del bòsc! Mas, a dotze contra tretze pendent 38 minutas, los Dracs faguèron pròva d’una solidaritat a tota espròva e pleguèron un sol còp a l’ora de jòc. Los angleses se vegèron refusar un ensag al vidèo per obstruccion, una palma lisèt de las mans de l’alièr blau al moment d’aplatussar. Los Dracs rajustèron quatre punts amb doas penalitats de Dureau e Inu (79a) per ganhar 26-16. Aquò lor i fa ganhar una plaça al classament, fa tanben noirir los regrèts sus totes los punts daissats en camin dins la primièra fasa e esperar una partida de tal nivèl e amb un tal resultat (mens l’expulsion, de segur) tre aqueste divendres a Huddersfield.
 
Son tanben al programa d’aquesta segonda jornada: Castleford-Warrington, dijòus; Leeds-Wigan, divendres; e St Helens-Hull FC, dissabte.
 
Dins lo Uèit del Mitan, Leigh mena 24-6 a la pausa e pèrd 36-26 contra Hull KR; Widnes ganha 14-0 contra Halifax; Bradford bat Sheffield 42-10 e Wakefield perseguís son espirala de desfaitas (26-34) contra Salford.
 
 
Preparar la sason venenta
 
Una activitat bèla e estivenca dels dirigents catalans es la preparacion de la sason venenta que veirà los desparts de jogaires clau coma lo menaire de jòc Scott Dureau, los segonda linha Zeb Taïa e Eliott Capblanc-Whitehead, lo talonaire Henderson…
 
Los catalans anóncian la venguda del mesclanha de Warrington Richie Myler, de l’alièr o arrièr Pat Richards (èx-Wigan, per ara en NRL als West Tigers), del segonda-linha o pilar Dave Taylor, del segonda linha maòri Justin Horo, del talonaire papó de Leeds Paul Aiton. Krisnan Inu voldriá ben demorar Drac.
 
Mas, a l’encòp, los Dracs an fait signar Tòni Gigòt per doas sasons; fruch de la formacion en intèrne, contracte professional per dos jogaires de la resèrva, Ugo Perez e Thibaut Margalet e per dos joves dels U19, Foad Yaha e Lucàs Albèrt. Aquò promet!
 
 
NRL: fa pas bon èsser primièrs
 
En NRL australiana, los dos caps de fila coneisson la desfaita: North Queensland a Cronulla 30-18; los Cavals Fòls de Brisbane coneisson una segonda desfaita de tira e se fan batre sus lor pelena 18-16 per Canterbury. Las doas formacions sèrvan lo cap del classament, mas veson los Polets de Sydneytornar a dos punts.
 
 
 
 
Alan Roch