Traversar ua bona partida de Shalòssa e de las Lanas de Gasconha per arribar en Vasadés a las termièras d’Agenés en partint de Baiona, aquò’s lo prètzhèit deus valents chancaires embarcats dens la Chancada. Quauques estancs son prevists hens lo Lana Gran (Arjusan, Sabres, Piçòs…). Precisions sus ua iniciativa qui permet de har descobrir autament lo nòste cabau tròp sovent ignorat e mespresat.

Dimèrcs 19 d’aost, quauques valents chancaires arribaràn a Piçòs. Acompanhats benlèu per quauques autes marchaires locaus pitats sus las lors chancas o per ciclistas pedalant tranquillament, que vieneràn de Sabres après ua estapa a Monthòrt de Shalòssa (dimenge 16) e Arjusan (diluns 17) on descobriràn la navèra resèrva naturau establida au torn de l’anciana mina de lignita que hadó foncionar ua centrau electrica de 1960 a 1992.
 
Partida de Baiona lo 13, aquera odissèa a granas camadas capvath ua bèra part de Gasconha s’acabarà a Marmanda lo 24. Entertemps que serà estada arcuelhuda a Belin-Beliet, Sent Sefrian, Vasats e Cocumont. Qu’es la dusau edicion d’aqueth eveniment que travèrsa un tròç sonque deu territòri gascon “per encontrar los qui’u hèn víver” (http://chancada.com/).
 
Aquera chicòia aventura es devuda a l’associacion deus Chancaires de Sent Pè de Leren. Aqueth vilatge aus extrèms de Bearn, tòca-tocant lo departament de las Lanas, près de Sòrda l’Abadia, n’avó evidentament pas, autes còps, aulhèrs apitarats sus chancas com hens lo Lana Gran. Mes, acerà, qu’i a grop de cantaires, musicians e dançaires qui, passionats per la lenga nòsta en generau e la cultura gascona, an adoptat las chancas. Après tot, aqueras atrunas de pastor non son pas lo monopòli de digun… Sheisanta ans a, aqueth grop “folcloric” que s’i hadè sonque per las prestacions abituaus de las formacions similaras. Totun, qu’a sabut non pas s’ancorar dens ua nostalgia escahida mes qu’a causit de’s rajoenir.
 
Dab, au còr, lo chepic de transméter la lenga d’òc, de formar e d’inventar animacions novatritz, los Chancaires que muishan un bèth dinamisme. Qu’organizan atau le hestenau Primtemps de l’Arribèra que, en abriu, amassa musicians, cantaires e dançanèirs, en tot prepausar filmes o mustras.
 
 
Conferéncia suus camins de la Lana
 
Caroline Dufau, ua de las calhivas obrèiras deus Chancaires e de la caminada, que serà de totas las estapas. Tà explicar aqueth encaminament que contribueish a har conéisher lo cabau lingüistic e culturau occitan qui es tanben lo de las Lanas de Gasconha. Mes tant ignorat e mespresat, malaja, com dens mantuns cantons deus País d’Òc! Era medisha que s’investeish pro dens la promocion e la transmission de la lenga occitana: dab duas autas cantadoras e musicianas qu’a format lo grop Cocanha que pro de legidors deu Jornalet coneishen, probablament. Recentament, au debut de julhet, qu’èran justament en Vasadés per la jornada gascona d’Escaudas de l’associacion Brigalhas de Pin.
 
L’estanc de Piçòs que’s harà au Cercle de l’Union, cafè associatiu dont los estatuts datan de 1907 e qui es la sedença de la Federacion deus Cercles de Gasconha (18 cafès d’aqueth escantilh en Gironda e hens las Lanas). A 17h qu’i averà un prosei dab projeccion de diapositivas (Powerpoint) sus la toponimia deus camins de las Lanas per la linguïsta B. Boyrie-Fénié. Puish, a l’òra de l’aperitiu e deu repaish, las gents, joenas camas aitant com las vielhas, que’s poderàn ensajar a se pitar sus aqueras camas de bòsc, totun ben coneishudas capvath lo Lana Gran. Per ben devèrzer e desligà’s las camas, la serada serà completada dab lo concèrt-bal de Pass’aires, lo grop animat per lo Yan Cozian e per lo Matiu Dufau, professors de musica “tradicionau” au Conservatòri de las Lanas. La boha landesa o “boha au sac” que serà au rendetz-vos. Contacte: +33 (0)5 58 08 90 85.
 
 
 
 
Joan Jacme Fénié