Un total de 30 palmierièrs d’Elx (País Valencian), e tanben d’autres endreches del país e d’endacòm mai, s’amassèron dissabte passat, 15 d’agost, dins aquela vila del sud del País Valencian per participar al 2d Campionat Internacional d’Escalada Tradicionala de Palmièr convocat per l’Associacion dels Palmierièrs d’Elx (APELX). Lo concors consistís a accedir a la copa d’un palmièr en escalant lo tronc de l’arbre amb una còrda nomenada soga. Solament aquela còrda e una autra de seguretat lor es permés d’emplegar, del temps que devon montar amb los pès descauces o amb de caucetas. Devon grimpar sus lo palmièr dins lo mendre temps possible e far sonar una campana plaçada sus l’arbre. Pòt participar quina persona que siá e ongan i a quitament participat un elegit. Sembla que l’an que ven i participaràn de femnas.
 
Aquel campionat se debana per far la vila mai atractiva e far venir mai de vesitaires dins la ciutat, qu’aculhís la palmareda mai granda d’Euròpa, e que prepausa “la rota dels palmièrs singulars” e “lo camin de la palmareda”, e tanben per sensibilizar lo mond a la cultura del palmièr, al mestièr del palmierièr e a l’environament.
 
Lo concors a creat ongan doas nòvas categorias, la categoria de “mèstre palmierièr” pels participants de mai de 40 ans e la categoria de velocitat pels participants entre 18 e 40 ans. Lo ganhant de la primièra espròva foguèt Demetrio López qu’obtenguèt l’espardelha d’aur, una còrda per grimpar sus los palmièrs (o soga) e 25 quilos de micòsi per combatre lo gorgolh roge dels palmièrs d’un biais ecologic. Dins la categoria de velocitat, lo palmierièr mai rapid del Mond es estat Isaac Carbonell, que li calguèt 10 segondas per grimpar sus lo palmièr. Carbonell ganhèt una autra espardelha d’aur, una tronçonadoira e 25 quilos de micòsi per combatre lo gorgolh roge dels palmièrs.
 
Ongan se poguèt pas grimpar sus lo meteis palmièr que l’an passat pr’amor que foguèt tombat pel vent. Lo campion d’alavetz, Iván Paterna Martínez, aviá ganhat en tot grimpar sus un palmièr de 13 mètres en 13 segondas. Lo palmièr del concors d’ongan fasiá 10,40 mètres.
 
A l’entorn del Campionat Internacional d’Escalada Tradicionala de Palmièr se debanan d’activitats e d’animacions pendent tres jorns. Lo 13 d’agost l’organizacion prepausèt de vesitas guidadas a la palmareda, a la tor de la Glèisa Santa Maria, per observar lo panorama e las tradicionalas “mascletà” e “Nit de l’Albà”. Lo 14 se vesitèt lo Musèu de la Palmareda e la rota dels palmièrs singulars demièg mantes programas, dins l’encastre de las fèstas de la vila. Lo15 d’agost, après la vesita a l’Òrt del Curat, se debanèt lo concors de palmierièrs. L’enveniment se debana al costat del Palais d’Altamira entre 19 e 21 oras. Vos i esperam l’an que ven.
 
 
 
 
Jonathan Sánchez i Macià