En mai de la lenga bretona celtica, lo pòble breton a una lenga romanica: lo galò. Se parla galò a l’èst de la peninsula dempuei tostemps. Dempuei quauques annadas, los militants del galò fan d’accions per promòure la lenga. En 2011, avián lançat una operacion nommada “Du galo su les paniaos” (“De galò sus los panèls”). La tòca èra de mostrar de panèls faits per los militants davant los ostals de la vila o quitament d’installar de panèls en galò a las intradas dels borgs (d’unes son encara en plaça, a Ilifao —22, País de Mené— per exemple). Dempuei 2011, s’es installat de novèls panèls oficials en galò dins quauques endreits: a l’ostal de region per exemple o dins la comuna de Biaocè dins lo País de Foujere (35). A La Bouéssiere (35) es una font que foguèt nommada en galò, a Saint-Martin (56) i a de panèls en galò long d’un chaminon interpretatiu d’ara enlà.
 
Aqueste estiu foguèt lançada una novèla operacion per lo galò per lo collectiu “Du galo su les paniaos”. La tòca es d’installar de panèls sus los chaminons, sus las “vias verdas” (los ancians chamins de fèrre, n’i a fòrça en Bretanha) o dins los vilatges. Los militants an començat de n’installar un pauc pertot. Long de la via verda entre Maoron e Qhitembé (56) n’i a fòrça ja (fòto). L’operacion es previst que dure fins al chap de la davalada.
 
Una pagina Facebook es vodada a l’operacion e tanben i a un hashtag #paniaos sus Twitter.
 
 
 
 
Fabien Lécuyer