Comencèt ièr dimenge, a Vilanuèva d’Òlt (Naut Agenés), la 41a edicion de l’Escòla Occitana d’Estiu (EOE), una setmana de convivéncia dins una residéncia que fa d’escòla e de lotjament a l’encòp. Tot se fa solament en occitan per çò que l’EOE es una bona escasença de far d’immersion lingüistica. L’eveniment es marcat ongan per la trista desparicion de Marcèu Esquiu, fondador de l’EOE, e de Felip Delpaire, un membre actiu de l’associacion e un professor d’escòla, que seràn remembrats e onorats.
 
Çò de mai important de l’EOE son los corses de lenga occitana dins totes los nivèls e dialèctes. Al delà, lo programa compren un molon d’activitats: de talhièrs, de conferéncias, d’espectacles, de danças, de descobèrtas pel terraire e una librariá completa de libres en lenga nòstra.
 
A l’EOE i a de mond de totes los atges, çò que fa que los escambis entre dialèctes e generacions son passionants, mai que mai en tot beure un còp a la beguda, a la fin de la jornada, abans lo balèti o l’espectacle.
 
Pels mai pichons i a l’Escoleta, amb d’activitats per enfants de 5 a 10 ans, e per lo jovent d’11 a 16 ans i a l’Escòla dels Adolescents (dicha “Escòl’Adòs”).
 
Los participants son normalament d’occitans que venon de pertot dins lo país, seguits per un grop de catalans plan nombroses. Al delà, i a sovent de mond de païses ben divèrses. Coma d’abitud, lo Comitat d’Afrairament Occitanocatalan (CAÒC) i serà, en tot portar fòrça participants. Lo CAÒC collabòra activament a l’organizacion de l’EOE en adusent, e mai, de professors de catalan e un grop de musica per la fèsta occitanocatalana, qu’ongan se tendrà divendres a la Plaça Lafaieta de Vilanuèva d’Òlt.
 
 
Segonda amassada de legeires de Jornalet
 
Dins l’encastre de l’EOE, Jornalet convòca la segonda “assemblada dels legeires” d’ongan. Se tracta d’una reünion dobèrta ont lo capredactor del jornal en linha explicarà son trabalh de cada jorn, lo foncionament del mèdia, e escotarà totas las opinions dels legeires que participen a l’assemblada. La tòca es de metre en comun d’idèas e d’avises e marcar la linha de seguir.
 
Una primièra amassada se debanèt lo 24 de julhet a Rodés, dins l’encastre de l’Estivada, e amb aquesta segonda se cèrca d’amassar de comentaris, de criticas e de contribucions per que Jornalet venga de mai en mai un jornal de totes e per totes.