An trobat cent vint silos de l’Edat de Fèrre a Corent (Limanha), una descobèrta arqueologica inaudita fins ara. La trobalha ajudarà los istorians a comprene “lo mòde de foncionament de l’economia galla, qu’es pas ges rudimentària coma se podiá supausar fa un centenat d’annadas”, çò a declarat a l’AFP Mattieu Poux, professor d’arqueologia de l’universitat de Lion (Arpitània) e responsable de l’excavacion, çò publica Le Monde.
 
Segon l’arqueològ, se tracta d’un “sistèma engenhós” de resèrva. “Cavats dins un sòl argelós, practicament impermeable a l’aiga e a l’aire, las fòssas èran emplidas a ras de bòrd de blat, òrdi o segal, puèi obturadas ermeticament”. Caduna podiá contenir “entre un quintal e una tòna de cerealas”. Parlam, doncas, d’un sistèma d’embalatge “jos voide” que permetiá de conservar las cerealas “mai d’un mes, o mai d’una annada”. Poux ne dedutz que la tòca d’aquel emmagazinatge èra de “sostenir un sètge” o ben que se trobavan “a la proximitat d’una granda plaça de mercat ont alavetz èra un atots excepcional”.
 
Las parets dels silos èran recobèrtas d’un lièch de carbon, çò que mòstra qu’èran esterilizats al fuòc “per èsser utilizats mai d’un còp”. Après “foguèron comolats de tèrra, perque servián pas pus”, çò soslinha l’arqueològ.
 
An pres de mòstras per far la datacion de l’excavacion amb l’espròva del carbòni 14.