A Aguilera la victòria de Biàrritz contra Clarmont 15 a 14 permeteish aus vencedors un aviéner ensorelhat e perqué pas la possibilitat de jogar a hons, la setmana que vien, lo quart de finau de Amlin Cup. Clarmont a sabut pas tuar la partida dab dus ensais e una possession importanta de la veishiga. Al mieitemps menavan 6 a 14 mès l'eficacitat de Yachvili sauvèt lo BOPB.

 

Dens quinze jorns se presentaràn a Jean Dauger dab l'etiqueta de favorit per lo dèrbi qu'espèra tot lo País Basco desempuish la dintrada deu pair Harinordoquy suu terrenh a la partida anar. A Aimé Giral, l'aviron baionés colèt fàcia a Perpinhan e un numèro dètz James Hook arretrobat. Las duas còlas ne son pas a la dotzau e tretzau plaça per arren. Mès deu costat baionés manquèren tròp de placatges per esperar préner punts en tèrra catalana. Au finau cinc ensais a zero e l'Aviron jogarà normaument en Pro D2 l'an que vien.

 

Sustòt que Briva ganhèt a la maison 14 a 9 contra Tolon, la còla en fòrma deu moment. Un gran Claarsen, tostemps au combat, permeteish uèi au CAB d'aver set punts d'avança suu tretzau. Quin coratge d'aqueth grop de jogaires de Briva, que meriteishen la soa plaça en Top 14!

 

Pòdem diser que la maishanta suspresa d'aquera fin de setmana vien de Lion on l'Union Bègla-Bordèu perdèt 24 a 13 shens préner lo punt de bonus defensiu. L'aprentissatge contunha peus gascons. Ne joguèren pas en purmèir mieitemps, en dusau ne poduren pas jamèi estar eficaces. Aquera des·hèita deu servir per l'an que vien: cau préner punts contra un club quasiment relegat. Aquera manca de realisme bota la pression a l'Union abans de recéber Agen lo 22 d'abriu.

 

Lo SUA a perdut a Montpelhier 44 a 18. Normau, un còp de mei, los agenés son trop flacs en mesclada. Mès dab l'enveja la marca qu'èra de 16 a 15 a la cincanta navau minuta, au moment deu carton jaune de Laurent Cabarry. De la sheisantau dinc a la fin prenuren quate ensais e vint e ueit punts. Montpelhièr es una grana còla dab una maturitat que'u pòt har esperar d'acabar tresau o quatau a la fin de la fasa qualificativa.

 

Per acabar la jornada Tolosa muishèt a tot lo monde qu'es lo favorit deu campionat. Après duas des·hèitas a Clarmont e Bordèu, son anats ganhar a París que jogava la sheisau plaça qualificativa. Los tolosencs an hèit lo mestièr. Dens una fasa complicada post sheis nacions e una setmana abans lo quart de finala de H Cup, n'avèvan pas lo dreit a ua tresau des·hèita consecutiva a l'exterior. Dab lo son jòc de davant saburen préner lo mielhor suus parisencs.

 

Plaça, la setmana que vien, a la Copa d'Euròpa dab dus clubs qualificats en H Cup.

 

Racing (BO) 27- 16 Castras

Biàrritz 15 -14 Clarmont (BD)

Perpinhan (BO) 47-9 Baiona

Briva 14- Tolon (BD)

Lion 24-13 Bègla-Bordèu

Montpelhièr (BO) 44-18 Agen

Estadi frances (BD) 18-22 Tolosa

 

*BO Bonus Ofensiu

 BD Bonus Defensiu

 

 

 

 

En Pro D2, ne vedem pas com Besièrs ne seré pas en Federala 1 l'an que vien. La victòria, dimenge, de Periguers pòt aufrir un espèr mès dab cinc punts de retard suu quatorzau a cinc jornadas de la fin, que sembla complicat.

 

Sustòt que Narbona a prenut un punt de bonus defensiu a Grenòble lo leader de Pro D2 es assegurat d'estar en Top 14 per la sason 2012-1013. An dètz e set punts d'avança suu second Dacs.

 

Per contra tot es dubèrt per la seconda plaça en Top 14. Que son cinc: Dacs, La Rochelle, lo Mont de Marsan e Carcassona, a poder pujar. Esperam que lo finau de la sason serà autant intensiu coma l'an passat, quan Bègla cincau avèva doblat tot lo monde en fasa finau.

 

Brembam que los dusaus e tresaus receberàn dens l'encastre de las semifinaus d'accession.

 

Dacs pòt esperar acabar dusau après la soa victòria fàcia a Oyonnax. Dab sheis punts d'avança suu quatau, son en bona pausicion abans de recéber la setmana que vien Periguers. 

 

Sustot que tots los autes adversaris dirèctes perduren punts importants a l'exterior. Pau viatja mau aquesta annada dab sonque tres victòrias. La lor des·hèita a Carcassona permeteish aus òmis de Christian Labit de créder enqüèra a la cincau plaça qualificativa, dab sonque dus punts de retard suu Mont de Marsan.

 

Eths an hèit vertadierament lo maishant ahar de la jornada en pérder a Orlhac. Aqueths darrèirs n'espèran pas mei hòrt de causa de la sason 2011-2012 desempuish un moment.

 

La Rochelle acabarà normaument dens los cinc purmèirs, mès com Pau, muishan una grana febrilitat a l'exterior. Dab la lor victòria a la maison contra los gascons d'Aush prenen la tresau plaça au bon moment, dens l'objectiu de las semifinaus d'accession.

 

Ais de Provença tuèt los darrèirs espèrs d'Albi d'acabar dens los cinc purmèirs.

 

La victòria de Tarba contra Bourgoin deisha un gost amar e estranh. Son dus clubs en cambiament e n'an pas d'objectius clars per las annadas a viéner. Bourgoin, club formator deus bons, cambièt de president aquesta setmana. Lo budget serà de 4 millions d'euros e lo naveth cap n'a pas l'amira de tornar en Top 14 de tira. La fin d'una epòca.

 

 

La Rochelle 34-25 Aush

Ais de Provença 35-27 Albi

Aurilhac 26-12 Lo Mont de Marsan

Carcassona 34-16 Pau

Dacs 38-14 Oyonnax

Grenòble 32-26 Narbona

Tarba 23-16 Bourgoin

Periguers 33-26 Besièrs

	Equipa	Punts	J	G	R	P	B	Bp	Bc	Dif
1	FC Grenòble	91	25	19	1	5	13	604	313	291
2	US Dacs	74	25	16	3	6	4	502	400	102
3	La Rochelle	72	25	16	0	9	8	580	449	131
4	S Pau	68	25	15	1	9	6	489	461	28
5	Estadi Montés	66	24	15	0	9	6	458	371	87
6	US Carcassona	64	25	13	2	10	8	533	507	26
7	Sc Albi	61	25	12	0	13	13	539	517	22
8	País d'Ais	57	25	11	1	13	11	538	541	-3
9	FC Aush	55	25	12	1	12	5	408	478	-70
10	US Oyonnax	55	25	11	1	13	9	496	499	-3
11	Estadi Orlhaqués	52	25	10	2	13	8	457	485	-28
12	Tarba PR	52	25	11	0	14	8	447	493	-46
13	CS Bourgoin J	49	24	11	0	13	5	460	545	-85
14	RC Narbona M	40	22	7	2	13	8	396	474	-78
15	Ca Periguers	35	25	6	0	19	11	401	570	-169
16	AS Besièrs H	33	25	6	0	19	9	374	537	-163

 

 

 

Eric Goyhenne