#20 Mon Dieu, Caramel 63, sias tròp intelligent per ieu. Compreni pas res...
Deu èsser tròp tard... o alara ai trèop begut de vin de Corent, coma lo paure Joan Bodon...

Prepausi a la FELCO de soscar de faire en auvernhe una estatua per l'Occitan que se sacrifiquèt per que totis los pichons de Corsega aguèssen de Corse dins las escòlas de l'estat! Los Corses pòdon granmercejar lo prefet Érignac!

#18 Oaf ! Oaf ! Danis Cantornet, que s'amaga darrièr aquel polit, chafre, e mai se ton analisi èra justa, èra una rason de mai per pas decidar, al darrièr moment, una manif per tot l'espaci occitan a Montpelhièr!!!!!

I a pasmens una nuança de portar dins ton analisi : ieu preni JAMAI de decisions sola : trabalhi AMB lo burèu de la FELCO e aquel del CREO Lengadòc, e consultam regularament los collègas.

D'autra part, avèm una lista de difusion que tot lo mond n'es destinatari, e mai Joan Lois Blénet.

Per contra, ai pas jamai, pas jamai de ma vida, recebut lo mendre messatge de JL Blénet. Aquò fai per ieu una gròssa diferéncia, dins lo biais de trabalhar amb los autres, non ?

Per contra, assumissi lo fach d'èsser la sola a dire publicament que lo biais de Blénet, n'i a pro ! Dins l'interès de tot lo mond e mai de las bonas relacions entre Calandreta e lo public, qu'existisson, que que ne pense Blénet ! O torni dire : avèm mai de causas de defendre en comun que de garrolhas de menar.

E te prometi, Danis Cantournet, soi capuda e laissi jamai lo morcèu !

Los problèmas màgers de l'occitanisme clapassièr e lengadocian son MJV e JLB, una qu'a LA VERTAT e l'autre qu'òbra SOLET a solelh colc! Lor jòia nafra l'autre... Chlorate de soude vs glyphosate !

#16 Avèm escambiat, recentament, amb Nicolau, sus sa non-compreneson de la posicion de la FELCO. Efèctivament, i aviá de causas que sabiá pas, coma o ditz, del long debat intèrne qu'avèm menat abans de n'arribar a la posicion de genièr de 2014, que voliam portar al debat public dins l'occitanisme, e non pas impausar, consultacion, o torni dire, que foguèt REFUSADA per nòstres partenaris.

Te mercegi, Nicolau, de çò que ditz del trabalh de la FELCO. E tanben de dire ont es ton desacòrd amb la posicion majoritària en cò nòstre de pas laissar a las collectivitats territorialas la mestresa de l'ensenhament de l'occitan. Aquò es una question plan complicada que s'amerita un debat, qu'es pas aquel que nos ocupa aicí e que reprendrem, Nicolau, quora voldràs, e amb grand plaser.

Just una causa : la FELCO es pas « centralista », es per un partatge de competéncias entre Estat e Collectivitats territorialas. Avèm un tèxt sus aquò, longament trabalhat, a mantun, qu'o explica tot. Es aquí : http://www.felco-creo.org/mdoc/detail_fr.php?categ=collec&id=1485. Se lo vòls legir, Nicolau, e donar ton vejaire, aquò nos interessa bravament.

Just una causa, Nicolau, soi militanta politica, sindicala, associativa, e dins cap dels endreches ont militi, ai un accòrd a 100 % amb « la linha ». M'empacha pas de m'engatjar - e de menar lo debat -perque pensi que i a pas que l'accion collectiva que paga.
As ta plaça, Nicolau, a la FELCO, e mai se i pòs pas faire que de causòtas de temps en temps. E demanda-te ont ne seriá sens FELCO, l'ensenhament de l'occitan... E pausa-te la question de la necessitat, aquí tanben, après la retirada dels respopnsables d'ara, d'assegurar la relèva.

Per lo demai de ta posicion. Los afaires de personas, a ieu m'amusan pas ! Sai que non ! Pasmens, retiri RES de çò qu'ai dich sus « l'incriminat », tot reconéisser, coma tu, son enòrme trabalh per Calandreta, o per lo teatre. Mas o torni dire : a pas de confiscar la paraula de l’occitanisme. N’i a mai d’un que o ditz en privat. Ieu o disi e o tornarai dire publicament.

Per ieu, justament, la democracia es una causa essenciala, e o deuriás comprene, Nicolau, estent tas posicions decentralizatrises, que las associacions montpelhierencas que representan l’ensenhament public sián tuertadas qu’òm lor aja impausada una manif sens las consultar e sens aver son accòrd.

Aquela manif es estat un còp de fòrça. E refusi de plegar dabans los còps de fòrça. Los collègas, eles, faràn çò que vòlon. I a pas de policia a la FELCO e lo 24 serai plan luenh de Montpelhièr.
D'autra part, lo CREO Lengadòc evocarà la question a l'AG de dintrada e aqui tanben, i aurà libertat de paraula e mai s'amagarai RES del foncionament de la coordinacion dempuèi 3 o 4 ans (en gròs dempuèi que David Grosclaude a causida l'accion politica, çò qu’èra evidentament son drech e que, fauta de cadres, a laissat l'iEO sota una governança… aproximativa...).

Aquí, la question que se pausa es aquela de l’encadrament de l’occitanisme cultural : los occitanistas son sovent investits, amb passion e intelligéncia, sus un terrenh limitat, geografic o sectorial (ensenhament, espectacle…). E degun a la disponibilitat o la capacitat de cubar l’espaci occitan tot, dins sa complexitat, de n’aver una vision complèta.

Resultat : una pauretat terribla de la reflexion culturala occitanista. I a pas que de legir l’organ de l’IEO federal… E quand i a pas de reflexion, la temptacion es aquela dels reflèxes autoritaris, coma l’imposicion d’una manif a Montpelhièr per un IEO federal que sa direccion provençala refusa categoricament que cap de manif se faga en Provença. O sabes, aquò, Nicolau ?

E vaquí una autra rason de ma colèra : la non democracia dins l’IEO, que ne soi membre.
Èri a l’AG federala a Montelaimar aquest an. 40 personas, discussions plan cortesas mas francas, entre autres sus « la » manif, amb l’expression de resèrvas d’unes militants non-lengadocians que començavan de n’aver son pro d’anar faire un passa-carrièra cada 2 ans sens qu’aquò lor serviguèsse dins son parçan. E ben, Nicolau, cercaràs dins Occitans !, lo jornal de l’IEO, dins lo CR de l’AG, l’expression d’aqueles debats. I es pas. Circulez. Y a rien à voir.

Vaquí, vaquí. Desolada de demorar dins la polemica. Mas a de moments, cal que las causas se digan.