Un tren reversèt divendres passat a Montluçon una carretona en tot projectar la drolleta de tres meses que i aviá dedins. Après qualques oras en essent espitalizat dins un estat d’urgéncia absoluda, l’enfant es mòrt, çò rapòrta La Montagne. L’accident se produguèt a 21h dins la gara de la Vila Goset. “Una ròda de la charretona foguèt blocada sus aquel passatge de pedons qu’enchamba la via ferrada. Sa maire poguèt pas retirar la ròda abans que lo tren arribèsse”, çò explicava lo jornal nòrd-occitan.
 
Una femna que vegèt l’accident l’explicava a La Montagne: “quand ausiguère lo tren, li cridère [a la maire] de far atencion, mas èra tròp tard. La mamà retenguèt son autre enfant de tres ans just abans la collision. Lo nenet gisclèt fòra la charretona abans de retombar vint mètres pus luenh”.
 
Segon Le Figaro, l’SNCF pòt pas encara donar de detalhs sus las circonstàncias de l’accident, mas a remembrat que “cal èsser extrèmament prudent quand se travèrsa de vias”. Una enquèsta es en cors.