Lo grand incendi de Catalonha es fin finala contrarotlat mas i a encara de trabalh a far. Ça que la, segon lo conselhièr d’Interior de la Generalitat de Catalonha, Felip Puig, après qualques jorns lo fuòc se poirà considerar extinguit.

Son a trabalhar mai de 1500 pompièrs, agents forestals, volontaris e l’unitat d’emergéncias de l’armada dins l’airal de l’incendi. O an fach per defòra qualques unitats per tèrra e un trentenat d’idroavions e d’elicoptèrs.
 
Es mai que mai imporant lo trabalh dels dos idroavions de l’Estat francés e per aquò cal desconnectar una linha electrica que va daissar quatre comunas sens electricitat.
 
I a pas mai d’òrdre de confinament, mas se recomanda a las gents de qualques vilas d’i sortir pas. Las estradas son ja dubèrtas.
 
La deputacion de Girona comença las ajudas als afectats amb la tòca de repoblar los bòsques cremats.
 
La Generalitat a anonciat que farà de pròvas geneticas per ensajar de trobar los responsables de la punta de cigarreta que, supausadament, causèt lo fuòc.
 
Del sieu costat, lo ministre de l’Interior de l’Estat espanhòl, Jorge Fernández Díaz, ditz que vòl reformar lo còdi penal per far mai sevèras las penas contra las imprudéncias dins lo bòsc.
 
Estat espanhòl e Generalitat de Catalonha son a avalorar los damatges per començar tramitar las ajudas.
 
 
Solidaritat aranesa
 
Lo Conselh Generau dera Val d’Aran a publicat un comunicat de sosten e de solidaritat del temps qu’Unitat d’Aran a mostrat la siá reconeissença pels pompièrs, mai que mai, los d’Aran, que trabalhan a l’extincion del fuòc.
 

Los pompièrs catalans o avián previst
 
Dins uns vidèo publicada en febrièr, qualques pompièrs catalans planhián las reduccions budgetàrias. Dins la vidèo dison que las condicions metereologicas d’ongan farián un estiu mai que mai sensible als incendis, e que lo fach de redusir talament lo budgèt s’agís d’una decision pauc intelligenta.