Existís en Bretanha un luòc unic: la Ribèira dels Sants (Traoñienn ar Sent en lenga bretona) a Karnoed (Còstas d’Arvòr). En vertat lo nom es pas ben chausit, quò qu’es puslèu un suchet. Ça que la, lo sit es supèrbe. Esvaurant! A la cima, vesèm tot lo “Kreiz Breizh”, es a dire lo mitan de la Bassa Bretanha.

L’endreit es compausat d’un cinquantenat d’estatuas per ara. Dins lo chap de l’estiu, un novèl talhièr serà dobèrt. Mas, al tèrme es previst mila estatuas segon los coordenaires del projècte.

Aquel projècte es simple: “far una Illa de Pascas bretona del millenni III. Un luòc d’esperitalitat onorant la sovenença comuna bretona”. Las estatuas de 3 mètres de nautor rapresentan de sants e de santas bretons e son faits de varena. Sus fòrça d’elas, es escrit unicament en lenga bretona e tota la senhaletica del sit es bilingüa. Chasca estatua còsta a l’entorn de 12 000 èuros. Son finançadas per de particulars o per d’entrepresas. “Produit en Bretanha”, que recampa las mai importantas entrepresas bretonas, es associat al projècte. Son lògo es talhat sus un blòc de varena a l’entrada. Tot aquà es ben representatiu de l’aliança d’ara entre çò economic, çò cultural e çò politic en Bretanha.

L’endreit es emplit d’esmai e d’esperitalitat e torna botar a l’onor los 7000 sants bretons. Pro d’eles son pas reconeguts per la glèisa catolica romana. Pasmens, fòrça bretons ne pòrtan los noms dempuei tostemps.
 
 
 
 
Fabien Lécuyer