CiU, ICV e ERC qu’acòrden eth nuclèu dera proposicion de pacte fiscau. Eth PSC que s’absten ena votacion sus era agéncia tributària unica, e eth PP, Solidaritat e C’s vòten contra.

Eth president dera Generalitat de Catalonha, Artur Mas, qu’anarà a negociar a Madrid ua proposicion de pacte fiscau que demane qu’era Generalitat e age era capacitat de decidir sus toti es tributs pagadi en Catalonha. Qu’ac harà per encomana deth Parlament de Catalonha, qu’a aprovat era proposicion damb eth supòrt de CiU, ERC e ICV-EUiA, e tanben damb eth deth PSC, exceptat es punts fonamentaus dera proposicion, que diden que cau que i age ua agéncia tributària unica en Catalonha. Eth PP que s’ei abstengut ena majoritat des punts der acòrd, mès qu’a votat contra es principaus, es que tanhen ara isènda pròpria. Solidaritat e Ciutadans qu’an votat contra tanplan, mès per arrasons opausades.
 
Artur Mas qu’a explicat eth contengut dera proposicion, que consistís, essenciauments, a conferir era gestion de toti es tributs ara Agéncia Tributària Catalana, qu’aurie plea capacitat e totes es atribucions, se ben collaborarie damb es autes agéncies tributàries, tanplan era espanhòla.
 
Sus era manèra de hè’c, qu’a indicat ua modificacion dera LOFCA. Ath delà, a dit qu’excludir Catalonha deth regim comun espanhòu non ère cap anticonstitucionau “coma bèri uns vòlen hèr a creir”. E qu’a arrebrembat que “damb era mitat deth pacte fiscau, eth deficit de Catalonha que serie zèro”.
 
“Be i a un cambiament de concèpte quant a çò que s’a hèt aguesti darrèri trenta ans, a on er estat a requectat e mos a finançat cossent damb es nòstes competéncies”. Un cambiament de modèl, ce ditz Mas, “que non serà aisit d’introdusir en ensems der estat, mès aqueres dificultats non pòden cap èster era excusa entà que Catalonha non dongue cap de responsa a un des problèmes qu’a. E aguesta responsa, Catalonha la pòt dar damb mès fòrça, se se presente coma un pòble amassat”.
 

Eth “quan” b’ei ara
 
Per açò qu’a persutat en besonh d’un acòrd generau. “Cambiar d’estatus non còste un quite èuro. Eth ‘quan’ b’ei ara, non mès tard. Ara que mos trobam mès en besonh que jamès qu’ei quan mos cau guardar mès tà delà. Eth pòble catalan que sap qu’ei o ara o jamès, e eth jamès non mos lo podem cap perméter”.
 
Mas qu’a demanat as fòrces politiques eth maximal consens possible, pr’amor qu’augure ua “batalha dura”, se ben ei “era melhora conjontura entà amiar entà deuant aguest projècte”.
 
“Er estat espanhòu non a cap de projècte entà Catalonha. Tanpòc semble qu’era Union Europèa non n’age cap de guaire clar. Mès Catalonha òc qu’a un projècte”, e eth projècte non s’acabaue cap damb eth pacte fiscau: “segur que cau anar mès tà delà”.

 
Acòrd de CiU damb ERC e ICV
 
Quauques menutes abans de començar eth plen monografic, CiU, ERC e ICV-EUiA qu’an arribat a un acòrd entà votar es sèt punts dera proposicion deth govèrn, que defen que Catalonha age era caisha e era clau dera caisha.
 
Eth president d’ERC, Oriol Junqueras, que s’ei regaudit der acòrd, que considère qu’ei un document de futur que consagre “era sobeiranetat e era independéncia fiscau de Catalonha”. Tanben a dit qu’er acòrd e servirà entà que non se torne jamès plus a intervier ena economia dera Generalitat. En aguest sens, que s’ei lamentat qu’eth plen de dimèrcles passat coïncidisquèsse damb era peticion de sauvament deth govèrn espanhòu, que se harà “damb es sòs que deu ath govèrn catalan”.
 
Quan encara manquen quauques ores entà votar era proposicion finau, Junqueras qu’a dit qu’eth nau modèl e s’inspiraue en modèl basc e navarrés, de sòrta qu’es catalans serien “es solets qu’an era capacitat de decidir sus es sòns impòsti”.
 
Que i a agut negociacions corre que correràs enquiara ora de començar eth plen entà sajar d’arribar ar acòrd mès larg possible. CiU e PSC qu’an apropat es sues posicions, mès es convèrses que se son estancades en un punt, eth dera agéncia tributària. Eth PSC que volie ua agéncia consorciada damb eth govèrn espanhòu, e CiU defen qu’era Generalitat age era caisha e era clau.
 
Era pòrtavotz deth PSC en parlament, Rocío Martínez-Sampere, qu’a dit que Catalonha auie de besonh un nau modèl de finançament, mès qu’èren contraris ath hèt que Catalonha e auesse era clau dera caisha.
 
Eth secretari generau d’ICV, Joan Herrera, qu’a refermat en pupitre deth parlament eth sosten deth sòn grop ath pacte fiscau e qu’a demanat ath govèrn e ath rèsta de partits de “tractar era proposicion deth pacte sociau a cuert tèrme” sense demorar que passen dus ans. Entà ICV, eth document aprovat qu’ei un pas tà deuant.
 
Eth PP que s’ei abstengut. Ena sua intervencion en parlament, era dirigenta deth partit, Alícia Sánchez-Camacho, qu’a sollicitat ath president de non portar as catalans tara “frustracion” damb ua proposicion de pacte fiscau que considère inviable e qu’eth govèrn espanhòu non acceptarà cap. Camacho qu’a aperat en tot moment ara crisi economica e financèra e qu’a considerat que “en moment talament dur que viuem non se pòt sométer un pacte fiscau contra Espanha”.
 
Solidaritat e Ciutadans an votat contra era proposicion.
 
 
 
 
 
Vilaweb
Traduccion: Ferriòl Macip