Se presenta aquesta setmana, en coïncidéncia amb la Setmana de la Mòda de la Nòva Zelanda, lo labèl “exempte de trabalh infantil” qu’acredita los produches fabricats sens emplegar d’obrièrs enfants. Lo labèl s’autrejarà a las societats que se someton a un audit d’Ernst & Young certificant que ni elas ni lors provesidors an pas emplegat de man d’òbra infantila dins lo procès de produccion.
 
Lo labèl es creat per Child Labor Free, una organizacion sens tòca lucrativa, creada per qualques dessenhaires neozelandeses coma Hailwood, Kate Sylvester o Stolen Girlfriends Club, amb lo sosten de l’UNICÈF e de l’agéncia de publicitat Saatchi & Saatchi.
 
Segon las darrièras donadas publicadas per l’Organizacion Internacionala del Trabalh (OIT), en 2013 i aviá 168 milions d’enfants que trabalhavan, çò que, segon la quita OIT, empedís que los petits ajan una enfança coma cal e un corrècte desvolopament mental, fisic e social.
 
Malastrosament, l’indústria de la mòda es una de las responsablas màgers de la creacion d’aqueles emplecs tan reprochables. “De la meteissa manièra que cercam lo labèl “exempte de cruseltat” (“cruelty free”) dins los produchs de beutat e que cercam de produches “biologics” dins los nòstres supermercats, cresèm qu’“exempte de trabalh infantil” deu venir un estandard reconegut al nivèl mondial”, çò ditz la directritz generala e fondadora de Child Labor Free, Michelle Pratt, segon Nueva Tribuna.