Actualitats
Las inondacions an damatjat los locals de Ràdio Lenga d’Òc
Albergats temporàriament dins los locals de la companhiá de teatre La Rampe-TIO, los de Ràdio Lenga d’Òc son a preparar la rintrada amb un pauc de retard
Las fòrtas inondacions que ne patiguèt Montpelhièr diluns passat an tocat los locals de Ràdio Lenga d’Òc. “Arribats sus plaça, que descobriguèren dab estupor l’estat deus locaus devastats per l’auratge de dimenge”, çò rapòrta La Setmana.
La còla de la ràdio occitanofòna aviá investit dins de material tecnic novèl arunan e se preparava per una rintrada dinamica e plan ambiciosa. “En aliança dab Ràdio Occitània (Tolosa), Ràdio Lenga d’Òc qu’aviá previst de mutualizar un jornalista a temps plen entà cobrir l’actualitat de las regions de Lengadòc-Rosselhon e Mieidia-Pirenèus, e tanben la Copa deu Mond de rugbi, la grana manifestacion occitana deu 24 d’octòbre a Montpelhièr e la campanha de las eleccions regionalas”, çò precisa encara La Setmana.
Albergats temporàriament dins los locals de la companhiá de teatre La Rampe-TIO, Ràdio Lenga d’Òc es a preparar la rintrada amb un pauc de retard. Pasmens, la còla de la ràdio an assegurat qu’aqueste malastre arrèsta pas lor volontat de menar aquel ambiciós projècte.
La ràdio occitanofòna de Montpelhièr, que s’escota sus las ondas FM a Monpelhièr, Seta, Alès o Milhau, èra ja afectada de restriccions budgetàrias, e aquesta catastròfa a fach mai grèvas las dificultats economicas. Ràdio Lenga d’Òc trabalha dempuèi dos ans amb la ràdio Niça Pantais (escrivon Nissa Pantai) e sas emissions se pòdon escotar en Vencenc e la Costièra Niçarda. Es benlèu ora de lançar una crida de sosten e de contunhar de far entendre l’occitan sus las ondas FM de Ràdio Lenga d’Òc de Montpelhièr.
L’emission de la FIMÒC, lo Mag[azine] de l’Estiu, ne parlèt dimars passat amb Brunon Cecilion de Ràdio Lenga d’Òc.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#3 Francesc, quin plaser de te tornar trobar aquí :)
Ta figurina i èra totjorn! Mudèt: un còp en dessús de la laissa dels CD, un còp en dessús de la laissa dels libres, mas i es totjorn a RLO ! Espèri que li es pas res arribat dimenge! ;)
Som estat a la Ràdio Lenga d' Òc a Montpelhier,e los porteri un record e Mallorca, una figureta de fang d'una pageseta mallorquina. Estigueren molt contents e la posaron a l'estudi de ràdio. Records per a Melanie que era una trebalhadora d'aleshoras de la ràdio.
Solidaritat de tot còr amb els (a defaut de poler mandar de sòus en sosten..., mas an pensat a far de Crowfounding en cas qu'aguesson da besonh d'argent?).
Escoti ràdio Lenga d'Òc Niça sus la ràdio numerica terrèstra e es gigant.
Es a soleta ràdio en occitan possibla dins nòstra region...
Un còp dels durs, pecaires, que las ràdios associativas an totjorn un equilibri financièr precari...
Ràdio Lenga d'Òc aviá investit dins de material e mai que mai un logicial novèl per gerir la musica que fa que las playslits èran vengudas un chale d'escotar.
Espèri que Ràdio Lenga d'Òc tornarà lèu sus las ondas e en linha (ieu l'escoti sus internet) e que poirà tornarmai aculhir lo mond, que, coma un molon de ràdios associativas, la pòrta de RLO es totjorn dubèrta als estagiaris, als escolans, als estudiants e a totes los que vòlon far una emission.
Coratge a tota la còla!!!
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari