La cap de la diplomacia europèa Federica Mogherini anoncièt dimars passat la signatura venenta de quatre acòrdis entre Kosova e Serbia, que representan lo pas endavant mai seriós per la normalizacion de las relacions entre los dos estats e lor possibla incorporacion dins l'Union Europèa.
 
Los presidents de Kosova e de Serbia, amassats dimars a Brussèlas, s’acordèron per crear una zòna autonòma sèrba dins Kosova, dins la region del nòrd ont la majoritat es sèrba. Aquela zòna autonòma serà somesa a la legislacion kosovara, mas benlèu Serbia finançarà l’activitat de las institucions.
 
Dos autres acòrdis fan referéncia a l’energia e a las telecomunicacions. Serbia a acceptat que Kosova obtenga un prefixe telefonic d’estat, lo +383. Serbia a lo +381 e fins ara los telefòns mobils de Kosova devián foncionar en emplegant de còdes estatals d’Eslovènia o de Mónegue, qu'avián acordat la cession d'aqueles còdes al govèrn kosovar.
 
Fin finala los dos govèrns se son acordats per un reglament d’usatge del pont de Mitrovica. Aquel pont separa las comunautats albanesa e sèrba e es estat lo luòc d’incidents fòrça serioses dins los darrièrs ans. Ara los dos govèrns s’engatjan a lo manténer dobèrt e a ne crear un protocòl d’usatge.
 
Los dos estats an considerat que los acòrdis èran una victòria. Serbia soslinha l’autonomia obtenguda pels sèrbes, del temps que Kosova remarca que, en signant aqueles acòrdis e en acceptant lo nom de “Republica de Kosova” per lo primièr còp Serbia n’a reconegut l'independéncia de fach.
 
 
UNÈSCO e Interpòl
 
Per las autoritats kosovaras l’acòrdi es un pas de mai endavant per obténer una reconeissença diplomatica totala. Kosova es ja un estat reconegut per la majoritat dels estats membres de l’ÒNU, mas encara ne fa pas partida. Pasmens, lo mes que ven presentarà la candidatura per far partida de l'UNÈSCO e d’Interpòl, e a fòrça possibilitats de ben capitar perque quitament lo Conselh de Seguretat de l’ÒNU o vei plan positiu.