Sonque dos jorns après la descobèrta d’un camion frigorific abandonat sus una estrada a l’èst d’Àustria amb setanta un refugiats mòrts asfixiats, la polícia austriana localizèt aqueste dissabte passat un autre camion près de Sankt Peter am Hart, dins la region de Braunau. Que transportava vint e sièis personas amagadas e que foguèron salvadas. Ça que la, tres enfants se tròban dins un estat critic per desidratacion e los an menats a l’espital. Lo menaire, un ciutadan romanés, foguèt detengut e mai s’ensagèt de fugir.
 
Segon las primièras informacions, los refugiats qu’anavan dins lo camion venon majoritàriament de Siria, Afganistan e Bangladèsh.
 
Tocant lo primièr camion descobèrt dijòus, son en gàrdia a vista las quatre personas detengudas en Ongria per presumida implicacion dins l’abandon dels refugiats. Las autoritats austrianas n’an demandat l’extradicion.