Se debanèt dimenge passat, 30 d’agost, la 19a edicion de la Corsa e Caminada des 15 Pòbles, organizada pes Volontaris d’Aran amb lo sosten del Conselh General d’Aran e una participacion de quasi 500 personas. Dins sos gaireben dos decennis, la corsa s’es assolidada coma una activitat esportiva que sa tòca es de recuperar los ancians camins e vias de comunicacion dels vilatges del país. “Era Corsa des 15 pòbles desvolope er excursionisme ena Val d’Aran”, çò disiá la conselhièra del torisme aranesa, Anna Díaz, en tot precisar qu’“era sua nauta participacion, hè difusion dera Val e ath delà collabòre ena diuersitat deth torisme”. De son costat, lo president de Volontaris d’Aran, Roberto Boya, considerava qu’es “ua iniciatiua importanta entath país tant a escala esportiua coma toristica e patrimoniau”.
 
La convencion que la signan cada an lo Govèrn d’Aran e l’associacion Volontaris d’Aran, al delà de l’ajuda economica, inclutz l’engatjament de l’organizacion de far de publicitat toristica del país e que la lenga oficiala de l’eveniment siá l’occitan.
 
Ongan, lo percors prepausava tres opcions de mai: una caminada de 19 quilomètres amb 900 mètres de desnivèl positiu e 800 de negatiu; una caminada de 5 quilomètres amb 100 mètres de desnivèl positiu e 200 de desnivèl negatiu; e la Corsa Juvenila pels nascuts après 1988 amb lo meteis percors que la caminada de 5 quilomètres.
 
Los ganhants d’ongan son estats:
 
 
Lo vicesindic d’Aran e conselhièr dels espòrts, Luis Carlos Medina, mercegèt los Volontaris d’Aran per l’organizacion de la corsa qu’es estada una reüssida.