Los primièrs cònsols de las comunas de Bossòst, Les e Vielha (Val d’Aran), s’amassèron diluns passat per tractar los continús talhs del servici de telefòn fixe, Internet e telefòn mobil de la societat Movistar, que castigan tròp sovent las comunicacions del país. Pendent l’amassada s’acordèron sus la signatura d’una declaracion conjoncha que manifèsta lo grand malcontentament tocant lo servici de la societat telefonica en Aran. Se cal, faràn d’accions legalas contra la companhiá pels “successius incidents” qu’afèctan las comunas e las entrepresas del sector toristic. La declaracion s’estendrà a d’autras municipalitats dels Pirenèus.
 
La tòca de la declaracion es d’encoratjar l’“immediat melhorament” de las installacions de telefonia. Al delà del primièr cònsol de Vielha, Juan Antonio Serrano, a l’amassada i participèron la conselhièra municipala, Maria Vergés, e los primièrs cònsols de Les, Emilio Medan, e de Bossòst, Amador Marqués. Los autres an excusat lor preséncia. Totun, an ja manifestat lor intencion d’aderir las municipalitats de Bausen e Canejan.
 
Atanben, la declaracion se remetrà a las entitats economicas del país per que, coma sector afectat pels talhs en lo servici, pòscan jónher la peticion, e un còp confirmadas totas las adesions, se remetrà lo document a la societat Telefonica Movistar, al Secretariat d’Estat espanhòl de las Telecomunicacions e al Departament de l’Entrepresa e l’Emplec de la Generalitat de Catalonha.
 
“Era accion conjunta de toti es municipis aranesi e des estaments economics d’Aran mos da fòrça deuant de Movistar entà qu’escoten es demanes de melhorament deth sòn servici, qu’actuaument se mòstre totaument ineficaç”, çò declarèt lo cònsol de Vielha, Juan Antonio Serrano.