Aylan Kurdi es l’enfanton de tres ans que dimècres passat lo trobèron mòrt sus una plaja de Bodrum, en Turquia. La barca que lo menava amb son fraire e sos parents a una illa grèga naufraguèt. Lo fraire, Galp, de cinc ans, e la maire, Rehan, moriguèron tanben negats. Solament subrevisquèt lo paire. Volián arribar en Euròpa per demandar un visat que lor permetèsse d’anar en Canadà, ont los esperavan qualques parents. La fotografia d’Aylan mòrt sus la plaja a esmogut aquesta setmana los rets socials e a dobèrt un debat etic sus la difusion de l’imatge. Ça que la, aquel imatge es ja vengut un simbòl del drama dels refugiats que fugisson la guèrra de Siria.
 
Lo paire d’Aylan e de Galp se nomena Abdullah, e dijòus èra a la mòrga per far l’identificacion sa femna e de sos filhs. Ara vòl tornar a Kobanê, en Curdistan, per los enterrar. La familha d’Abdullah foguèt desplaçada qualques còps e en 2012 fugiguèt en Turquia. Partiguèron de Kobanê a causa dels intenses bombardaments entre l’Estat Islamic e los milicians curds, que defendián la vila. Abdullah Kurdi, ara, solament pensa de tornar dins son país e ditz qu’a pas cap d’enveja de demorar en Euròpa.
 
Fergal Keane, Jornalista de la BBC, parlèt amb el, e publiquèt aquesta fiulada sus Twitter: 
 

#AylanKurdi Father Abdullah tells me wants to bring his dead children home to Kobane pic.twitter.com/vQUi2jkk02

— Fergal Keane (@fergalkeane47) September 3, 2015

 
 
Canadà lor refusèt l’asil coma refugiats
 
Teema Kurdi, la tanta d’Aylan e de Galp, demòra en Canadà e s’assabentèt de la tragèdia per una telefonada del paire. Ela expliquèt als mèdias canadians qu’aviá ensajat de pagar lo viatge de son fraire, de sos nebots e de sa conhada amb l’ajuda economica de sos vesins. “Mas los poguèri pas traire d’ailà e es a causa d’aquò que s’embarquèron. Lor pagavi una renda en Turquia, mas la manièra que i tractan los refugiats sirians es òrra”, çò diguèt. Teema Kurdi, qu’es perruquièra a Vancouver, fa vint ans que demòra en Canadà. Demandèt l’asil per sos parents coma refugiats, mas las autoritats canadianas lo concediguèron pas.
 
Segon lo jornal britanic The Guardian, en Canadà sonque las personas designadas formalament coma refugiats pòdon demandar l’asil e fòrça curds explican qu’an de dificultats per obténer aquela consideracion dins los camps d’aculhiment del NACNUR, l’agéncia de l’ÒNU pels refugiats.
 
Après l’estomagada internacionala que l’a causada l’imatge del petit Aylan mòrt, lo govèrn de Canadà a autrejat l’asil a Abdullah Kurdo. Tròp tard per el. L’a refusada. Solament vòl retornar a Kobanê per enterrar sa familha, e i demorar.
 
 
Detencion de quatre suspèctes
 
La polícia turca a detengut quatre suspèctes d’aver participat a l’organizacion de las barcas que menavan la familha Kurdi, demièg mantes refugiats, cap a l’illa grèga. Segon la polícia, los detenguts son membres de las màfias que desplaçan de refugiats per mar. Dins lo naufragi d’aquel grop d’embarcacions moriguèron un dotzenat de personas, segon l’agéncia d’informacions estatala turca.