Divendres passat, 4 de setembre a miègjorn, a Camurac (País de Saut Lengadocian) un grop d’agents immobilièrs que vesitavan de terrens a despart del vilatge en companhiá d’un vesin ausiguèron de còps de fusilh tirats a un centenat de mètres. Se precipitèron cap a ont venguèron las detonacions al ras d’una jaça e lai descobriguèron que qualqu’un aviá tirat sus Olivier Bedos, un noiriguièr plan conegut dins la region per la qualitat de son trabalh. L’assassin aviá tirat sus sa victima qu’èra assetada dins sa veitura a travèrs del parabrisa.
 
Los pompièrs arribèron rapidament sul luòc e li provesiguèron los primièrs secorses, mas de badas, Olivier Bedos, paire de tres mainatges, ja èra defuntat de las balas qu’aviá recebudas en plen pitre.

Qualques minutas abas l'agression, l'assassin aviá amenaçat sa victima e sa femna per telefòn. Es en fugissent en veitura qu'Olivier Bedos tombèt sus l'embuscada tenduda per son agressor. S’agissiá de Jean-Pierre Fabre, noiriguièr el tanben, associat d’Olivier Bedos dins l’encastre d’un GAÈC, e abitant lo vilatge vesin de Montalion.

Amb l’ajuda d’un elicoptèr la gendarmariá entamenèt alara una caça a l’òme per trapar l’assassin que s’èra escapat. De lor costat los abitants del ròdol se metèron en cèrca del fugitiu. A 19h l’assassin —presumit— foguèt trobat a qualques centenas de mètres de son domicili ont viviá amb sos parents. S’èra suicidat amb un fusilh.
 
Sembla qu’un diferent entre los dos òmes sus la reparticion de las parts socialas del GAÈC siá a l’origina del gèst de Jean-Pierre Fabre. Aqueste assassinat a completament trebolat la comunautat del País de Saut que la familha Bedos i es plan coneguda e respectada: lo paire de la paura victima ne foguèt mètge pendent plusors decadas. Aqueste assassinat, que pausa de nombrosas questions, daissa una familha dins la pena mai extrèma e la populacion de tot un parçan macada e nafrada.




Loís Vidal