Los Jòcs Olimpics de Londres son estats inaugurats dins la polemica a causa de la fòrta preséncia militara e de las accions d'urbanisme dins lo quartièr de Stratford.

Arser se debanèt la ceremonia inaugurala dels Jòcs Olimpics de Londres. Ça que la, lo fotbòl poguèt pas esperar e s’avancèt un parelh de jorns.
 
L'endeman de la proclamacion de la capitala britanica coma sedença olimpica, un oportun atemptat terrorista descadenèt la psicòsi sus la seguretat dels Jòcs, çò qu’a justificat que se militarizèsse los Jòcs Olimpics. Se son presas de mesuras coma la legalizacion de jutjaments exprès, la susvelhància amb d’elicoptèrs militars o lo plaçament de missils tèrra-aire sus fòrça terrassas de la vila. Sembla que Londres visca una situacion de guèrra que justifique blindar la vila amb un grand desplegament de maquinariá militara aeriana, terrèstra, fluviala e marina en tot mesestimar los dreches fondamentals de las personas.
 
Mai de 25 000 personas, entre polícia, armada, vigílias privats e volontaris contrarotlaràn los ciutadans e los visitants. L’operacion de “seguretat” costarà qualques 650 milions d’èuros, mas normalament dins aqueles cases lo budgèt puèja sovent mai.
 
Es lo tresen còp que Londres aculhís los Jòcs Olimpics, en aquela escasença a Stratford, a l’èst de la vila. Stratford èra fins ara un dels quartièrs paures de la vila; ara los Jòcs i an portat l’especulacion e las accions d'urbanisme que qualques residents questionan. Qualques vesins denóncian que son estats deslotjats per far un quartièr de design.

 
Qualques ligams per seguir los Jòcs
 
Los mèdias britanics rapòrtan detalhadament los Jòcs.
 
BBC: activitats previstas fins al 12 d'agost, percors de la tòrcha olimpica.

The Guardian: seguiment dels Jòcs,  passejada virtuala pel parc olimpic.
 
Eurovision: totas las competicions en dirècte.