L’11 de setembre, los catalans se remembran de la casuda de Barcelona en 1714 davant las tropas borbonosas. Lo País Valencian casèt en 1707 e Malhòrca en 1716. Aquela desfacha representèt la fin de las institucions catalanas e la castelhanizacion del país.

301 ans après la pèrda de sas libertats, Catalonha festeja son jorn nacional en regardant l’eleccion plebiscitària del 27 de setembre: de comicis al Parlament autonòm que serviràn per saber quantes partisans i a per l’independéncia. Es lo sol biais legal que s’es trobat per far lo referendum que l’estat espanhòl permetèt pas de celebrar arunan, e mai se se faguèt.
 
Los actes institucionals se debanèron ja dimècres per interferir pas en una campanha electorala qu’es començada uèi e que serà marcada pel caractèr de l’eleccion e la possibla independéncia de Catalonha e Aran. Dins los jorns precedents, los caps de l’estat espanhòl an cercat la complicitat de Merkel e Cameron contra l’independentisme e quitament an ensajat de modificar la lei per que lo Tribunal Constitucional pòsca punir lo president catalan. L’armada tanben a menaçat.
 
Del costat independentista, se debanarà uèi una manifestacion qu’es prevista multitudinària e que cèrca d’emplenar cinc quilomètres de l’avenguda Meridiana de Barcelona. Es de soslinhar que las manifestacions indepdendentistas de cada 11 de setembre son fòrça nombrosas, especialament la cadena umana de 400 quilomètres fa dos ans, e l’enòrma V que dos milions de manifestants dessenhèron per carrièras a Barcelona arunan.
 
 
Dos blòcs: òc o non
 
Lo plebiscit en forma d’eleccions a obligat totes los partits de se definir sus la creacion d’un estat independent catalan. Lo blòc de l’“òc” es configurat per la coalicion nomenada “Amassa per l’Òc” —amb CDC, ÈRC, Democratas, lo Movement d’Esquèrra e Avancem, que compta amb lo sosten de l’Assemblada Nacionala Catalana (ANC) e d’Òmnium Cultural— e per la candidatura de la CUP-Crida Constituenta. Dins lo blòc del “non” i aurà las listas del PSC, del PP e de Ciutadans. Amb una posicion indefinida e amb d’elements dels dos blòcs i aurà Union Democratica e la coalicion nomenada “Catalonha Sí que se Pòt” (qu’amassa Podemos e ICV-EUIA).
 
Segon los sondatges, i auriá una victòria dels independentistas.