Los fonzes, anonciats pendent una conferéncia internacionala, se destinaràn als camps de desplaçats, al desminatge e al bastiment de lotjaments e d’escòlas, particularament dins las zònas curdas de Siria e d’Iraq. Laurent Fabius ditz que los beneficiaris de la mobilizacion internacionala devon èsser “los crestians d’Orient, los iaziditas, los turcmèns, los curds e los shabaks”. La conferéncia a demorat sièis meses per èsser convocada malgrat la situacion desesperada de fòrça comunautats.

França destinarà, d’en primièr, 25 milions d’èuros per ajudar las “victimas de las violéncias etnicas e religiosas” de l’Orient Mejan, segon çò qu’anoncièt dimars passat lo ministre dels afars estrangièrs francés, Laurent Fabius, a la sortida d’una conferéncia internacionala omonima, impulsada per França e per Jordania. Aquela, çò diguèt Fabius, deuriá èsser la primièra de tot una seguida de contribucions internacionalas que ne deurián beneficiar “los crestians d’Orient, los iaziditas, los turcmèns, los curds e los shabaks”.
 
La conferéncia arriba gaireben sièis meses après que lo quite Fabius presidiguèsse, al Conselh de Seguretat de las Nacions Unidas, un debat sus las violéncias que patisson aquelas comunautats al mitan dels conflictes de Siria e d’Iraq. Mentre que la conferéncia s’èra pas encara celebrada, los curds, los shabaks, los iaziditas, los druzes e mai d’un autre grop son estats objècte de multiplas violéncias, pas sonlament en Siria e en Iraq, mas tanben en Turquia, en Liban, en Iran e en d’autres estats de la region.
 
Segon de donadas del Burèu de Coordinacion dels Afars Umanitaris (OCHA) de l’ÒNU, lo conflicte de Siria a expulsat del país 4 milions de personas. D’autres 7,6 milions son de desplaçats intèrnes. La chifra equival aperaquí al 65% de la populacion de Siria. En Iraq los desplaçats intèrnes son 3,2 milions, sens donadas suls refugiats —d’ONG internacionalas calculan que son almens de centenats de milièrs—.
 
Las comunautats non musulmanas sunnitas son desproporcionadament afectadas per aqueles desplaçaments, segon çò qu’admet l’ÒNU.
 
Los 25 milions promeses per França, çò expliquèt Fabius, serviràn, entre d’autras intencions, per reabilitar lo camp de desplaçats de Bardarash (Curdistan del Sud, estat iraquian), per desminar de zònas iraquianas e los entorns de Kobanê (Curdistan Occidental, estat sirian) e per bastir d’escòlas e de residéncias.
 
Lo fuèlh de rota internacional, çò diguèt lo ministre francés, se basarà sus tres grands aisses. Lo primièr serà “çò umanitari”, per “facilitar lo retorn volontari d’aquelas populacions perseguidas dins las tèrras que ne son estadas fòrabandidas”, çò que comprendrà l’usatge de la fòrça, çò diguèt Fabius. Lo segond ais serà de favorizar de “condicions politicas que permetan l’enracinament durable de las comunautats menaçadas”, e doncas Iraq e Siria deurián venir d’“estats inclusius”. Lo tresen ais serà “la lucha contra l’impunitat” dels “autors de crimes de guèrra e crimes contra l’umanitat”.
 
 
 
 
 

---

Aquesta nòva es adaptada de Nationalia amb qui Jornalet a un acòrdi de cooperacion.