Actualitats
De salariats de Sanofi protèstan a Montpelhièr contra lo plan de “reorganizacion” de la societat farmaceutica
Segon los manifestants, entre 1000 e 2000 pòstes de trabalh son menaçats. Philippe Mercey, pòrtavotz de l'intersindicala (CFE-CGC, CFTC, CGT, CFDT e Sud) denóncia qu'aquel plan met en dangièr la santat del pòble e ditz que van manténer la pression fins al comitat d'entrepresa extraordinari.
Qualques 300 salariats de Sanofi manifestèron dijòus passat davant los locals de l'entrepresa per protestar contra lo plan de reorganizacion de la societat farmaceutica.
"Tot çò que sabem, es qu'en setembre escaparem pas al plan social", çò diguèt Philippe Mercey, pòrtavotz de l'intersindicala (CFE-CGC, CFTC, CGT, CFDT e Sud).
Segon aquel plan, entre 1000 e 2000 pòstes de trabalh son menaçats. Al delà, se Sanofi suprimís la recèrca, la quita santat del pòble es en dangièr, çò disián los papieròts que distribusián los manifestants.
"Anam manténer la pression fins al comitat d'entrepresa extraordinari. I a de gents en vacanças e los que trabalhan se van mobilizar", çò diguèt Sr. Mercey, en remembrant qu'en 2010 un plan de sortidas volontàrias dels qu'avián mai de 55 ans èra ja estat menat.
Lo director general de Sanofi, Chris Viehbacher confirmèt dijòus passat que lo plan de reorganizacion, mai que mai per çò qu'es de la recèrca en França, auriá "un impacte sul trabalh", sens donar cap de chifra. Mas indiquèt que las proposicions concrètas seràn presentadas a la fin de setembre als sindicats.
Sanofi emplega a l'ora d'ara 1165 salariats a Montpelhièr.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#1 La rason dalh mai fòrt es sempre la melhora ?
Òu, fau aterrir, me sembla ! Una entrepresa privada coma SANOFI a pas per tòca ni de donar trabalh au monde, ni de pagar plan son monde, ni mai de potingar lo monde, e mai siá una entrepresa farmaceutica. A per tòca unica de far moneda, sempre mai, sempre mai aviat. Tot çò mai, es pas que lucha o parlicada bufèca…
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari