Una Hèsta de la Catinon a Sent Lis virada cap a la joenesa
La Catinon se hesteja les 21ans en companhia deus escolans d’occitan e amb Alidé Sans, J. Passerat, J.L. Blenet e Groland de Canal+
Es le 21n anniversari de la Catinon a Sent Lis e aquera hèsta, occitana e populara, contunha sa modernizacion en se virar cap la joenesa. Le desir de Carles Molin, creator de las aventuras de Minjacebas, èra “de tocar lo mès de gents possible en occitan.” L’associacion sentlisiana avança sus aqueste camin en reorientar la siva hèsta e en la concentrar sus dus jorns, au lòc deus tres abituaus: les 2 e 3 d’octòbre.
La hèsta començarà le dissabte 19 de setembre, au pè de la torassa deu Capitòli de Tolosa, ont lo president de Groland, Salengro, receberà lo tribut de l’Occitània annexada. La Catinon, interpretada per J.L. Blenet, donarà lo pes en cebas au president Salengro, de l’emission satirica de Canal+.
Le divendres 2 d’octòbre, a 20h30, au cafè le Millénium, 7 Plaça de la Libertat de Sent Lis, Alidé Sans cantarà soleta. Le concèrt es gratuit. Serà l’ocasion de poder crompar enfin le siu prumèr CD, Eth paradís ei en tu, hèit amb l’ajuda de l’associacion Catinon.
En invitant la joena e talentosa cantaira aranesa, l’associacion Catinon vòu tocar un public ajoenit. Aquò s’explica pr’amor qu’a la dintrada de 2002 se draubisquèc la prumèra seccion bilingüa francés-occitan deu País Tolosan. Se hasquèc a Sent Lis, comuna de quasi 9000 abitants, en Gasconha Tolosana. Les joens de la seccion bilingüa profièitan d’un ensenhament occitan-francés, a paritat orària, dins las escòlas sentlisianas de la mairala au licèu.
Le grand moment serà a Sent Lis, le dissabte 3 d’octòbre, que peu prumèr còp concentrarà un pilòt d’activitats. Començarà a 11h amb una granda messa occitana a la glèisa de Sent Lis de l’abat Jòrdi Passerat. Tot aquò serà seguit d’una granda taulejada gastronomica a 12h30 a la sala de Graveta de Sent Lis, animada per la corala Sèt de Cants. Après le repaish, de 15h a 16h30 i aurà la “partida de rugbi de Pirolet” hèita per Geneviève Séguro; puèi una peçòta de Catinon, hèita per J.L. Blenet, entitolada Catinon se cèrca lo Jacotin. Le repaish-espectacle còsta 24 èuros.
Apuèi serà le torn deus dròlles de la seccion bilingüa, a 18h, que haràn amb l’ajuda de la Catinon e de Manu Isopet quauques cants occitans. La Catinon, hèita per J.L. Blenet, balharà bonbons aus dròlles ende’us remerciar e les grands auràn la tradicionala còca de cebas de Minjacebas amb le còp de vin doç (es a gratis!). Tot aquò serà seguit d’un repaish tolosan a 8 èuros e d’una balòcha gratuita de Manu Isopet a partir de 19h30.
Totas las nombrosas activitats gratuitas son possiblas gràcias au sosteng de la vila de Sent Lis dins l’encastre deu Hestenau Occitània.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Acò serà un gran succès, la coca de seba, la coca de trampó, la coca de verdura, la coca de Montserrat, lo vin dolç, vin a voler del Bearn, de Tolosa, Bordeu, Soternes,..., la convidada, la minjada a gràtis e a mai, repartir bombons, confits e caramels, a petits e grans, acò va pla, atal es fa la festa. Amb bonas cançons occitanas, dança, e farandolas.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Acò serà un gran succès, la coca de seba, la coca de trampó, la coca de verdura, la coca de Montserrat, lo vin dolç, vin a voler del Bearn, de Tolosa, Bordeu, Soternes,..., la convidada, la minjada a gràtis e a mai, repartir bombons, confits e caramels, a petits e grans, acò va pla, atal es fa la festa. Amb bonas cançons occitanas, dança, e farandolas.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari