Llanfairpwllgwyngyllgogerychwyrndrobwllllantysiliogogogoch es una comuna del País de Galas, qu'es lo toponim mai long d’Euròpa. La setmana passada lo temps foguèt plan bèl e arribèt a una de las temperaturas mai nautas del Reialme Unit e, pr’amor d’aquò, aquel nom longàs apareguèt sus las nòvas del temps de la cadena Channel 4. Aquò foguèt pas ges un empediment per que lo presentaire del temps del canal, lo metereològ Liam Dutton, ne comentèsse la temperatura e per que prononcièsse, sens cap d’esfòrç aparent, lo toponim d’una tirada.
 
Dutton ja aviá anonciat sus Twitter que prononciariá lo toponim, e a recebut un fum de felicitacions e de reconeissenças suls rets socials.
 
L’origina d’aquel nom quilometric de cinquanta uèch letras foguèt una invencion d’un estatjant, a mitan del sègle XIX, per donar mai de publicitat a la vila qu’alavetz se nomenava Llanfairpwllgwyngyll. Lo nom actual, fòrça pus long, significa “la capèla de Santa Maria de l’avelanet près del remolin rapid e de la capèla de Sant Tisili de la cauna roja”.